係人都知，立法會議員就職時個個都要宣誓「盡忠職守，遵守法律，廉潔奉公，為香港特別行政區服務」。可惜吖，反對派政客宣誓當食生菜，盡忠職守、為香港服務係假，不務正業、「為拉布服務」就真。正如「東方報業民意調查」顯示，多數受訪者認為立法會拉布已成常態，唔止阻撓法案，而且阻礙工程及民生，港府束手無策，一味望天打卦，香港已經到咗「行政亂、立法爛、官僚廢」嘅地步，想唔死都幾難。
遠嘅唔提，就講版權修訂條例吖，經過立法會超過兩個幾月漫長拉布戰，先後五次流會，最後港府頂唔順，被迫「就此作罷」，成為「推出一項、跪低一項」嘅最新例子，唔止浪費大量時間及公帑，而且阻礙其他議題，港府焗住要求立法會調動議程，優先處理臨時撥款議案，以免出現財政懸崖。唔少受訪者認為，經過今次版權修訂條例跪低，港府管治權威再受重創，日後反對派有恃無恐，拉布流會更加頻密，施政只會更加寸步難行。
又難怪市民咁悲觀嘅，立法會烏煙瘴氣，版權修訂條例受阻只係冰山一角，連成立創科局都要經歷三次觸礁及長達三年半嘅拉鋸，最後至僥倖過關，問你服未。至於大型基建工程咯喎，更加係阻力重重，舉步維艱。尤其係高鐵工程一拖再拖，造價一漲再漲，如果最終因為立法會拉布而未能通過追加撥款，分分鐘要停工甚至爛尾，都咪話唔大鑊。正如多數受訪者話齋，高鐵工程拖得愈耐，超支愈勁，反對派為拉布而拉布，完全不顧後果。
所以話，政府無能，政客無良，市民只能自求多福。最離譜嘅係，依家唔止行政立法關係惡化，連港產官僚都各懷鬼胎，各有各講。好似最新一份財政預算案同早前發表嘅施政報告咁吖，簡直格格不入，財爺擺到明同特首唱反調，甚至刻意強調「本土化」，都唔知究竟有乜目的。正所謂，禍起蕭牆，港產官僚唔係齊心治港，反而互相拆台，唔怪得施政混亂、烏龍百出喇。
自作孽，不可活，香港回歸以來深陷政治泥沼，爭拗不斷，紛紛擾擾，「港人治港」淪為「拉布治港」，搞到發展停滯不前，競爭力跌跌不休，都咪話唔閉翳。港府成日強調「民生無小事」，仲話要集中精神搞好經濟民生添，可惜自身難保，變成吹水唔抹嘴。
講到底，家和萬事興，家衰口不停。政治爭拗唔可以當飯食，內鬥內耗盞冇運行，如果反對派唔肯合作，如果港府冇辦法阻止拉布，香港只有死路一條嘅咋！