生有時，死有時，港府跪低亦有時。版權修訂條例拉鋸兩個多月，立法會依然無法完成審議，港府被迫宣布將草案調至最後一項，即係又以跪低收場。
其實，版權修訂條例跪低早就係意料中事。由舊年十二月立法會恢復二讀開始，當局一直陷於捱打狀態，喺反對派政客瘋狂拉布之下，唔止寸步難行，立法會仲多次上演流會鬧劇添。家陣條例草案「就此作罷」，官僚可以提早收工，唔使再丟人現眼，而市民亦樂得耳根清淨，未嘗唔係一種解脫㗎。
最好笑嘅係，港府同反對派罵戰兩個幾月都唔夠，臨尾仲要上演一場口舌之爭。商務及經濟發展局局長蘇錦樑批評反對派議員一味推、拉、閃、抽，有責任就推卸，有布就拉，點完人數就閃，有水就抽；佢仲引用金庸小說《倚天屠龍記》裏面張翠山及殷素素自刎前囑咐張無忌一幕，叫市民「認住呢班人」。而反對派議員亦不甘示弱，以金庸另外兩部小說《鹿鼎記》及《笑傲江湖》回敬，仲連希臘神話都搬埋出嚟添，問你服未。
唉，高官同議員開會唔係討論正經事，反而大談武俠小說及希臘神話，簡直九唔搭八。香港家陣面對嘅問題千頭萬緒，挑戰多多，淨係旅遊及零售業走下坡，經濟前景不明朗，已經令好多企業同打工仔憂心忡忡，如果官僚同議員真係咁得閒，不如諗辦法搞好經濟先喇。納稅人花咁多公帑養呢班政客，佢哋唔係議事論事，而係一味拉布，有破壞無建設，你話係咪離譜吖？對唔對得住納稅人吖？
所以話，香港睇嚟都係冇得救嘅嘞，官僚無能，政客無良，想唔死都幾難。大家有眼見，近年立法會烏煙瘴氣，成個鬥獸場咁，唔止癱瘓施政，仲癱瘓成個香港，版權修訂條例跪低只係冰山一角咋。咪畀人估中吖，反對派拉布走火入魔，已經失去理智，萬一高鐵追加撥款又被拉低，到時唔止成為國際笑話，而且成為香港災難添。古人話，上下不合，令乃不行。香港行政立法惡鬥不休，何止令不行，直頭冇運行喇。
提起《倚天屠龍記》，功夫茶諗起其中一個情節，周芷若為取得武學寶典，不惜以倚天劍同屠龍刀互砍，結果兩把曠世奇兵玉石俱焚，斷成兩截。港府同立法會當然唔能夠同曠世奇兵相提並論，但如果繼續鬥落去，遲早玉石俱焚，到時盞大家都冇運行嘅咋！
正所謂，五十步笑一百步，香港搞到今日咁嘅地步，港府有責任，政客有責任，雙方都無謂再逞口舌之爭咯，如果真係咁有火氣，不如為市民做啲實事好過喇！