陳腔濫調嘅講法係，權力令人腐敗，有冇新鮮少少嘅講法呢？有有有，蔭權令人敗壞。
蔭權嘅意思係蔭庇特權，身先士卒嘅表表者當然係過氣特首曾蔭權啦。由於劣迹斑斑嘅「貪曾」起到帶頭作用，家陣即使換上一個梁朝政府，官場中人依然係恃權橫行貪得就貪。正所謂咯喎，上有好者，下必甚焉，廉潔奉公嘅核心價值真係危危乎o架。最新一個涉嫌貪便宜嘅官場中人係民航處處長羅崇文，有消息人士踢爆佢犯咗三宗罪。
首先，羅崇文涉嫌濫用公帑並且浪費資源，包括帶同妻子出席公務酬酢活動，情況就好比前廉政專員「貪湯」湯顯明帶同女友出席公務酬酢。其次，羅處長雖然有政府車輛管接管送，但係佢嘅私家跑車同房車周不時佔用位於金鐘道政府合署嘅民航處免費車位。你知啦，金鐘道政府合署停車場於晚上及假日開放畀外來車輛停泊，時租二十三元，羅處長佔用車位等於造成庫房收入損失。
第三宗罪係咁嘅，民航處部分人員包括處長在內，間中會去到香港飛行總會駕駛定翼機，活動同民航處日常工作冇乜關連，不過費用就由公帑支付，懷疑有人假公濟私。本報記者從民航處取得資料發現，二○一二年四月至今，民航處共有十四名人員去到飛行總會進行七十一點八小時嘅駕駛定翼機練習，涉及十九萬五千元支出，其中處長佔六點六小時。
大家唔好唔記得喎，民航處負責嘅係空中交通管理事宜，佢哋耗資二十億元興建嘅新總部大樓竟然附設專業舞蹈室，無厘頭到唔知為乜，你話唔係假公濟私都冇人信啦。
前人蔭權後人貪，在上位者做壞咗榜樣，撥亂反正唔容易o架。另一個例子係有「機場保安一哥」之稱嘅周富祥，身為機場保安有限公司行政總裁嘅佢，涉嫌未經董事會准許擅自申領超時津貼，又將自己嘅假期換取薪金，涉及款項一百四十萬元。周富祥今年六月被廉署拘捕，董事會決定終止佢嘅聘用合約，即係炒魷咁解，你話係咪上樑不正下樑歪啊。
喂，權力令人腐敗嘅歪風幾時先至吹得完呢？恃權橫行奸鬥奸嘅劣行幾時先至會遏止呢？不如咁講啦，殺一先至可以儆百，敲山先至可以震虎，廉署一日唔將貪曾繩之於法，繼續任由貪遍海陸空嘅佢逍遙法外，其他大官小吏以及商界人士係唔會識驚o架。香港勝在有ICAC吖嘛，如果廉署唔秉公辦理肅貪倡廉打老虎，香港遲早要墮落到好似盂蘭節鬼門關大開！