禽流感殺到埋身 防疫魔不容輕心

廣東省確診全省首宗人類感染H7N9禽流感個案，患者係惠州市博羅縣一名從事家禽屠宰嘅女雞販，目前情況危重，要靠呼吸機協助呼吸。廣東當局大派定心丸，話呢宗只係單獨個案，對密切接觸者嘅醫學觀察暫未發現異常，又話出事嘅菜市場已經關閉並消毒喎。

嗱，內地官方有冇全面披露疫情資訊，姑且不提，功夫茶只知道廣東係供港活家禽大省，二十八家供港活雞註冊養殖場，惠州佔咗八家，每日輸港七千隻活雞入面唔少來自惠州，你話今次疫情對香港有冇威脅吖？更可怕嘅係，惠州距離本港只有約一百公里，病毒傳播神速，話到就到，萬一禽流感出現人傳人個案，香港都幾難獨善其身。

正如古人話齋，弗備難，難必至。呢隻禽流感病毒殺傷力非同小可，今年三月喺華東率先爆發，短短時間就到處蔓延，連台灣都有人中招，至今已有一百三十幾宗感染個案，四十幾人死亡，死亡率達三成二。即係話，中招者只有不足三分之二機會生存，你話唔驚就假。

香港大學微生物學專家袁國勇警告，喺街市工作嘅人較多機會接觸家禽，感染風險相對較高，建議政府為佢哋驗血。佢擔心，如果內地未能夠研製出疫苗，今年冬天H7N9會再度活躍，令更多人受感染。

其實，粵港唇亡齒寒，廣東失守，香港睇怕都幾難幸免，稍有差池，隨時全線崩潰，重演當年沙士悲劇。嗱，為免歷史重演，當務之急係未雨綢繆，立即採取措施加強防疫，寧緊莫鬆呀。即係咁，既然禽流感已經喺廣東出現，就算香港唔停止輸入所有內地活家禽，至少都要暫時停止輸入惠州嘅活家禽喇，係咪？

咪話功夫茶唔提醒官老爺，疫症當前，千祈咪輕描淡寫，虛應故事吖。呢，早排中東爆發新沙士疫情，華東又爆發禽流感，香港面臨雙疫夾擊，當局口口聲聲非常關注，實情係公立醫院把關不嚴，衞生黑點依然如故，邊境口岸中門大開，萬一真係病毒入侵，後果不堪設想。

禽流感殺到埋身，防疫魔不容輕心。香港家陣時運不濟，政治爭拗不斷，社會怨氣沖天，港府風雨飄搖，最混亂嘅時候，往往就係最易出事嘅時候。車公靈籤早就提醒港人，今年「宜慎小人，凡事不利」，如果真係好嘅唔靈醜嘅靈，禽流感大爆發咯喎，呢個跛腳鴨政府一定提早玩完。