保險經紀要交數，股壇精英要跑數，類似嘅情況大家都聽唔少嘞，勢估唔到原來仁心仁術嘅杏林聖手都要篤數，呢鋪真係大開眼界。所謂篤數，即係以虛假資料冒充實際情況，當中牽涉瞞天過海嘅欺詐成分。喂，商界政界大千世界就話多蠱惑仔啫，否則都唔會出現詐騙租津嘅短命局長落台兼罪成啦，懸壺濟世嗰一班醫護人員唔應該咁冇誠信喎。
功夫茶講緊嘅係東華醫院，專治大小便失禁嘅理遺護理診所懷疑為求達到診症數目而篤數。瞞天過海嘅具體辦法係咁嘅，署名「東華醫院一群憤怒的護士」嘅投訴信指出，有人喺今年二月短時間舉辦兩次職員講座，要求參加者提供身份證號碼簽到，近百人嘅資料被輸入登記診症系統之內，一眾人等成為預約診症嘅「病人」，無端端病到大小便失禁嘅包括東華醫院行政總監余詩思。投訴者更加懷疑有人偽造診症或護理紀錄，醫管局港島西聯網認為指控嚴重，成立臨床服務稽核小組深入調查。
醫院點解要篤數咁冇品呢？無他嘅，為咗爭取醫管局嘅財政分配囉，於是就出現呢一種好人好姐被失禁嘅怪現象。「東方報業民意調查」發現，四成三受訪者認為事態嚴重，必須徹查事件；兩成七直斥事件離譜，會導致資源分配不公；兩成四覺得事件涉及公職人員行為失當。
講真吖，若然功夫茶係東華醫院管理層，見到同事做出咁嘅事，一來會羞愧於院方醫德有虧，二來肯定感到無地自容。你老屈還老屈吖，竟然老屈自己係失禁病人一褲都係，傳出江湖鬧笑話吖嘛！
民意調查又顯示，對於有前線醫護人員踢爆類似篤數事件並非首次發生，四成二受訪者批評醫管局監管不力；兩成九憂慮造成資源錯配影響病人；兩成五擔心事件只係冰山一角。
至於醫管局話要成立調查小組跟進，大家又點睇呢？四成三受訪者認為應該交由獨立機構調查；兩成五更加認為應該展開刑事調查；另外兩成五擔心醫管局自己人查自己人，難免醫醫相護。
其實歸根究柢講到尾，東華醫院之所以爆出篤數醜聞，唔多唔少都同醫管局有關。大家試想想，香港嘅醫療事故汗牛充棟，邊個責任最大吖？香港嘅醫療系統亂七八糟，邊個難辭其咎吖？若然醫管局本身唔係千瘡百孔，斷估杏林聖手都唔會折墮到使出欺上瞞下嘅邋遢招數啦。即係咁，其實患有大小便失禁嘅係醫管局，如果唔調理好呢一個特大號病人，成個醫療系統始終一褲都係！