古人教落，世不患無法，而患無必行之法。真係一啲都冇講錯。嗱，一向以大食懶出名嘅食環署官僚，執法是是但但，求求其其，有法例等於冇法例嘅咋。
話說店舖阻街屢禁不止，搞到七國咁亂，申訴專員公署前排主動調查食環署處理阻街敷衍塞責，點知該署官僚左耳入右耳出，依然故我，乜都唔做，結果阻街問題唔止冇解決，仲不斷惡化添。呢，淨係睇吓其中一個阻街黑點觀塘瑞和街，就知道情況有幾嚴重嘞。
有讀者向本報投訴，瑞和街大部分店舖將行人路當私家攤位擺放貨物，原本超過十呎闊嘅行人路只剩番幾呎畀人行，搞到買嘢好似打仗咁，你撞我，我撞你，隨時引發口角甚至動粗。唔少人焗住行出馬路，人車爭路，險象環生。
仲有吖，部分店舖霸咗行人路未夠喉，連馬路都霸埋，居然當街擺賣，路過嘅車輛避完貨又要避人，司機一唔留神隨時撞板。居民向食環署投訴，得到嘅答覆竟然係，馬路唔係佢哋管，要求投訴人報警喎，你話係咪九唔搭八吖。
更搞笑嘅係，食環署發言人回應本報查詢，一樣不知所謂，好似人肉錄音機咁噏咗一大堆數字，包括過去一年接咗幾多宗涉及瑞和街嘅阻街投訴，提出幾多宗檢控，罰幾多錢，唯獨冇解釋點解阻街情況毫無改善，仲愈來愈嚴重。其實講嚟講去，阻街問題不斷惡化，原因只有一個，就係食環署執法不力。署方多年來懶懶閒，阻街霸路話之你，卒之咪搞成咁囉。正如有立法會議員話齋，今時今日局面失控，食環署肯定要負上全責。
話時話吖，執法懶懶閒已經成為食環署嘅特色。好似另一個重災區旺角花墟一帶咁，花店、水果店及藥房等商舖阻街擺賣情況隨處可見，市民不斷投訴，但情況毫無改善，搞到申訴專員公署主動介入，食環署當時誓神劈願話會配合調查，結果又係風頭一過，一切如故。
不過咁，食環署喺違例店舖面前好似無牙老虎，但對住普通小販就兇神惡煞，成個「港產城管」咁款。大家應該仲記得，前兩年有位喺中環擺檔擦鞋嘅七旬老伯，畀食環署連續票控，連鞋箱等謀生工具都充公，搞到好多市民睇唔過眼，炮轟食環署欺善怕惡；另外有位小販趁農曆新年入咗一批鮮花諗住做啲小生意，點知花未卸落車就被食環署人員以阻街為名全部充公，血本無歸嘅小販走上食環署大樓企圖跳樓自殺，差啲搞出人命。
應做唔做，唔應做就亂嚟，食環署本末倒置，唔怪得店舖阻街問題不斷惡化。嗱，既然食環署官僚對付小販咁兇神惡煞，不如去旺角行人專區幫一幫警察，睇吓仲有冇人講粗口好過喇！