顧名思義，消防處嘅職責係替市民消災防火。不過今時今日，功夫茶有理由相信，消防處已經淪為現代東廠，真正任務係充當政治工具，打壓正義傳媒；至於消災防火咯喎，求求其其嘅咋，鍾意就理，唔鍾意就話之你。
呢，消防處早前單憑一封理據不足嘅電郵投訴，便勞師動眾派人直闖東方報業中心，並深入報館核心地帶伺服器房，結果證實投訴子虛烏有，空手而回。其後本報將二十宗與消防安全有關嘅讀者投訴轉介消防處，大家估下佢哋點樣處理？講都無人信，該處居然以「欠缺具體地址」為由，拒絕跟進其中十二宗投訴！
單憑一封真假不明嘅電郵，消防處就高調踩上報館，但係收到涉及公眾消防安全嘅市民投訴，反而唔嗲唔吊，關人個關，咁仲唔係擺明玩針對？仲唔係政治迫害？消防處不務正業，以打壓新聞自由為己任，視公眾消防安全如無物，咁不如掛正招牌做東廠啦，笨！
其實，消防處以欠缺具體地址為由拒絕跟進部分投訴個案，只係卸責藉口嘅咋。嗱，本報記者只係花咗一日時間，就根據該十二宗投訴發現大量消防安全隱患，包括走火通道或梯間被雜物阻塞、天台被封鎖或有僭建屋、工廈防煙門被鎖死、電線交疊等等。記者一查就查到咁多問題，反而消防處居然矇查查，你話佢哋係咪失職吖？正如有立法會議員質疑，消防處派人實地一探究竟有幾難啫。計功夫茶話齋，實地一探一啲都唔難，難就難在消防官僚本末倒置，應查唔查。
更離譜嘅係，喺本報轉介嘅二十宗讀者投訴中，消防處承認其中八宗涉及緊急車輛通道嘅投訴具迫切性需作處理，但竟然交畀其他部門跟進，自己就闊佬懶理，卸得就卸。喂，人命關天o架，兩年前土瓜灣唐樓起火釀成四屍五命慘劇，旺角花園街一場四級火又奪去九條寶貴性命，歸根究柢就係消防隱患埋下禍根，消防官僚唔只冇吸取教訓而且有投訴唔跟進，有亂象唔巡查，咁同草菅人命有乜分別？
講到底，消防處懶理市民投訴，真正原因唔係唔知地址，而係敷衍塞責。功夫茶想問消防處處長陳楚鑫，閣下有閒情當街煲煙，點解無時間管理好消防處？你嘅手下可以滋擾傳媒，點解唔可以處理真正嘅安全隱患？唔通你真係以為自己係東廠公公，消防安全唔關你事？
不如咁喇，功夫茶想盡好市民責任，向消防處舉報一個最大嘅消防安全黑點，就係烏煙瘴氣、七國咁亂嘅尖東消防處總部，今次地址清清楚楚，消防官僚冇理由拒絕跟進嘞啩！