淫賤黎旗下壹淫媒宣淫販賤係人都知，估唔到上綱上線都有一手，竟然有本事將一單普普通通嘅風化案夾硬指桑罵槐，係都要將本來毫無關係嘅東方報業集團拖落水，呢一班「呻吟從業員」實在居心叵測。所以話啫，壹淫媒係破壞傳媒生態嘅業界敗類，確係一啲都冇講錯。
即係咁，有一個三十九歲嘅已婚男子，網上認識一名十四歲中三少女，藉詞慶祝少女生日，約佢去酒店開房，其後又多次發生性行為，被告承認三項非法性交罪。簡單咁講，有人衰十一，亂搞未成年少女。令人眼火爆嘅係，《蘋果日報》即時新聞居然將被告形容為「曾任《東方日報》最高層專用廚師的已婚男子」。
冇錯，呢一個已婚男子曾經任職東方，不過並唔係乜嘢最高層專用廚師，而係一個普通到完全唔起眼嘅小職員。更何況，涉案男子任職東方係○九年嘅事，後來佢轉職航空公司以及酒店。換言之，被告犯案嘅時候同東方完全冇賓主關係，因乜事幹爛果報係都要混為一談呢？標題係話「曾任報館高層御廚」，點解唔係「航空員工」或者「酒店御廚」呢？好明顯啦，淫賤黎公報私仇，利用含沙射影嘅邋遢手段抹黑競爭對手，鬼叫《東方日報》長期高踞全港銷量冠軍咩，爛果報心有不甘唔服輸，咪陰險詭詐射毒箭囉！
呢嗱嗱嗱，一人做事一人當，一淫做事一淫當，功夫茶正告各位親愛嘅讀者，嗰一個亂搞未成年少女嘅已婚男子同東方徹頭徹尾冇任何關係，唔似得壹淫媒的而且確專出犯罪分子。
大家記唔記得《蘋果日報》有一個突發記者叫做劉江群？冇錯嘞，呢一個突發記者賄賂警察通訊員買料，違反防止賄賂條例，廉署將佢拘捕歸案。結果咯喎，法官判劉江群罪名成立入獄十個月，而兩名受賄嘅警察通訊員分別判囚七個月同九個月，劉江群淪為香港第一個因為工作關係干犯刑事罪行入獄嘅記者。至於台灣《壹週刊》記者臧家宜同男友黃尚平，由於恐嚇勒索鴻海集團董事長郭台銘而被判入獄八個月。
除咗員工干犯刑事罪行之外，壹淫媒嘅案底都罄竹難書啦，旗下刊物違反《淫褻及不雅物品管制條例》過百次，尤其係創刊短短日子嘅《爽報》，由於誨淫誨盜而收到嘅投訴鋪天蓋地而來，簡直係人人喊打嘅過街老鼠。
不過點都好啦，辦傳媒最緊要做好新聞搞好業績，玩抹黑係無用嘅。事實係，壹淫媒雖然上綱上線抹黑競爭對手，始終唔會扭轉《東方日報》長期高踞全港銷量冠軍嘅事實，唔好再枉作小人嘞！