消防處醜聞不絕 招民怨引火自焚

嗱嗱嗱，講到廢柴，大家梗係即時諗起嗰套頻頻瓜柴嘅消防處第三代調派系統啦，作為緊急救援系統，居然不斷死機，萬一耽誤救火救人，消防官僚齊齊打柴都得咯。話時話，消防處管理混亂，醜聞多多，又點只死機咁簡單吖，所謂物似主人形，調派系統壞完又壞，消防處內部管理一樣亂上加亂，屈指一數，至少犯下管理六宗罪。

第一宗罪，調派混亂延誤救援。廢即係廢，第三代調派系統故障頻生固然阻礙救援，其實就算操作正常，一樣經常黐晒線，亂咁分派救護車，一時東車西送，一時北車南調，搞到七國咁亂，一○年令一名心臟病發老翁延誤救治，白白害死一條人命。救火救人分秒必爭，調派系統甩甩漏漏，唔係死機，就係亂點鴛鴦，你哋究竟係救人定害人呀？

第二宗罪，縱容員工違規不斷。嗱，講到呢樣，消防處高層真係一視同仁o架，呢邊對救援工作漏洞熟視無睹，嗰邊對下屬違規亦隻眼開隻眼閉，有人喺消防局內花天酒地唔理，有人將消防車當溝女工具又唔理。最令人側目嘅係，○八年西貢旅遊巴車禍造成十九人死亡，到場嘅消防員居然以旅巴殘骸做背景，笑笑口拍照留念，同消防官僚一樣麻木不仁。

第三宗罪，逢迎成風不務正業。最經典一幕係舊年消防處為咗接待京官，廣東道尖沙咀消防局封局半小時，消防員同救護員奮不顧身高度戒備，不過唔係救人，而係表演救人騷。救火英雄淪為奉承權貴嘅人肉道具，都唔知可悲定可笑。

第四宗罪……算啦，消防處爆醜聞多過爆水喉，再數落去隨時數到天光都未完。淨係消防總部好似冇掩雞籠，職員食堂變成大眾飯堂，就知佢哋有幾離譜喇。前消防處處長林振敏係咁講嘅，消防處以前形象正面，係最受歡迎嘅紀律部隊，但係近年每況愈下，負面新聞不絕，佢認為係管理鬆懈直接影響服務質素，令外界對消防處失去信心。嗱，現任消防處處長陳楚鑫，你究竟知唔知醜？

即係咁，消防官僚嘅面皮好似防火牆咁厚，應該唔知醜字點寫o架嘞，如果唔係，消防處又點會搞到醜態百出，形象插水吖。咁啦，等功夫茶再次提醒消防處，你哋嘅本職係救人救火，唔好不務正業，一味掛住做政治工具打壓新聞自由嘞，否則，隨時引火自焚，火燒後欄呀！