親近淫媒疏正義 民主阿婆搞分化

以前官場倫理講嘅係,不在其位,不謀其政,即係收檔之後就應該收聲,唔好阻住地球轉。之但係世風日下今時唔同往日咯,家陣嘅退休高官好鬼死過癮㗎,不在其位,亂謀其政,收檔之後硬係芳心難耐死剩把口點都唔肯收聲,表現最出位嘅係前政務司司長陳方安生,一位婆婆級嘅所謂民主鬥士。

民主阿婆退而不休,亂謀其政,可惜由於腦筋不清,語無倫次,所以出醜多過食飯。佢尤其關心淫賤黎,或者因為淫賤黎同佢分屬「搞事四人幫」啩,所以壹淫媒任何風吹草動都會牽動民主阿婆嘅神經,仲會上綱上線添。

淫賤黎寓所以及爛果報運報車最近分別受到襲擊同騷擾,民主阿婆接受訪問嘅時候就話嘞,覺得呢種行為令人非常擔心,社會矛盾分化日益加深,好大程度上係因為政府採取親疏有別以及敵我分明嘅態度喎。

唉,有口話人冇口話自己就係咁解囉,民主阿婆自己何嘗唔係親疏有別呢?何嘗唔係敵我分明呢?好簡單啫,同樣係傳媒受到騷擾,東方報業集團近來被政府多個部門以種種莫名其妙嘅藉口上門滋擾十二次,呢一位退休高官幾時緊張過呢?幾時幫腔伸張正義呢?一次都冇,證明民主阿婆對淫賤黎親如心肝寶貝,對於正義傳媒咯喎,簡直疏到好似陌路人。

其實又好難怪嘅,江湖傳言搞事四人幫之間有一種非常獨特嘅賓主關係,食咗狗糧嗰個當然要奮起護主啦。各為其主本來係無可厚非嘅,之不過民主阿婆既然自己都係親疏有別,好心就唔好用同一把尺去批評人哋啦,市民眼睛係雪亮㗎!

正所謂,人老精,鬼老靈,年紀老邁好多時候有着數。問題係人一老就可能乜都假,棚牙可能係假,頭髮顏色可能係假,連條脷都有機會係假嘅,唔怪得民主阿婆語無倫次,亂噏廿四。所以計功夫茶話齋,大家對於民主阿婆嘅虛假言論千祈唔好太認真,當笑話聽好喇。

深閨怨婦顧影自憐,不甘寂寞都好難怪嘅。當年民主阿婆位極人臣做咗回歸之後第一位政務司司長,竟然挾諸侯以令天子,以為自己係十八萬公務員之首,就有能力架空當時嘅特首董建華,點不知引火自焚,反而受到冷落,結果黯然離開官場,到依家仲係忿忿不平,所以咪經常出來亂謀其政囉。

點都好啦,民主阿婆親淫賤疏正義,雙重標準嗰個係佢自己至啱!