佛家話，善有善報，惡有惡報，簡單啲講，即係因果循環，報應不爽。呢，消防處烏煙瘴氣，綱紀敗壞，又不務正業，無事生非，會有乜嘢報應呢？答案就係火燒後欄囉。講起真係難以相信，消防處總部居然自身難保，發生火警，呢啲咪就係如假包換嘅現眼報囉！
話說位於尖東嘅消防處總部大樓尋日早上突然警鐘大作，今次唔係警鐘壞，亦唔係演習，真係發生火警，原來係十樓伺服器房嘅光管火牛懷疑過熱冒煙而出事。根據消防處自己所講，係光管嘅變壓器冒出少量煙霧，觸發房間內一個煙霧偵察器，繼而啟動自動火警警報系統喎。結果大樓內幾百名職員包括多名消防高官要匆忙逃生，有名女職員仲報稱不適添，都唔知幾狼狽。
唉，能救不自救，消防處畀祝融光顧，情況好比差館畀人打劫，都唔知好嬲定好笑。最諷刺嘅係，消防處早前以收到一封電郵投訴為由，指東方報業中心伺服器房灑水系統有問題，高調派人上門滋擾，最後證實投訴純屬子虛烏有，一無所獲。原來咯喎，的確有人嘅伺服器房有問題，不過唔係報館，而係消防處自己，你話係咪搞笑吖！
嗱，消防官僚今次都算瘀到貼地嘞，平時也文也武一味叫市民提高警覺，注意防火，其實最無防火意識嘅就係佢哋自己。係人都知，伺服器房係消防處嘅「心臟」，萬一毀於祝融，指揮系統隨時跪低，後果不堪設想。堂堂消防總部居然咁兒戲，佢哋究竟有冇認真檢查嘅呢？究竟有冇維修保養嘅呢？消防官僚淨係識查人，自己大本營隱患處處，呢啲咪叫有口話人無口話自己囉！
最好笑嘅係，消防處平時救火救人甩甩漏漏，烏龍百出，今次自己火燒後欄，居然勞師動眾，派出八輛消防車及近五十名消防員撲救，簡直令人難以置信。只係一場小火啫，居然浪費大量人手，萬一其他地方發生大型火災，咁又點算吖？唔通消防處處長陳楚鑫等消防高官條命矜貴啲？
所以話，一滴水看世界，一把火睇到消防處烏龍百出。消防處醜聞不絕，亂象叢生，救火裝備甩甩漏漏，員工違規綱紀敗壞，擦鞋文化歪風四起，管理混亂疏忽職守，打壓傳媒居心叵測，試問咁嘅部門點會唔惹火呢？
人在做，天在看。古時昏君無道，朝政腐敗，上天就會以天災示警，家陣消防處總部無緣無故起火，會唔會係老天爺對消防官僚嘅警告呢？防火之道係禁於未然，睇嚟港府係時候認真整頓嗰班消防官僚，如果唔係，今次就話小火啫，等到民怨大火燒通頂至嚟撲救就太遲嘞！