香港自詡國際金融中心，其實投資陷阱無處不在，令人防不勝防，淨係倫敦金騙案就禁之不絕，長呃長有，講出去都丟架喇！
呢嗱，又有人中招嘞。有騙徒以賺取高回報做餌，透過電話促銷手法尋獲獵物，投資者初期會獲小利嘗甜頭，但係數個月後即被通知蝕清光，血本無歸，橫財夢碎。正所謂，橋唔怕舊，最緊要受。警方接獲舉報後，揭發投資公司懷疑又係藉虛假投資騙財，初步已知最少有五名市民上釣，由初出茅廬嘅年輕人，到「身經百騙」嘅退休人士都有，有人仲痛失五百萬元棺材本添，講起都一殼眼淚。
正如外諺話齋，第一次受騙係對手嘅錯，第二次受騙就係自己嘅錯。倫敦金騙局都唔係第一次啦，歷史幾乎仲悠久過港交所，咁都不斷有人上當，投資者真係要好好檢討嘞。講真，呢個世界邊有咁大隻蛤乸隨街跳吖，政府宣傳廣告不斷提醒大家，投資回報高，風險自然高。如果有人同你講，倫敦金似執金，風險超低，回報超高，唔使問阿桂，閣下誤墮天仙局嘅風險高達九成九。
當然啦，倫敦金騙案長呃長有，投資者有問題，當局更加有問題。唔係咩？咁多年嚟同類騙案從未停止過，當局居然視如不見，翹埋雙手唔去堵塞漏洞，咁咪即係睇住市民踩落陷阱！點解倫敦金騙案禁之不絕呀？咪因為無王管囉，既唔受法例監管，亦唔屬證監會同金管局管轄範圍，更加無強制性發牌制度，任何人申請商業登記就可以開業，不法之徒唔乘機招搖撞騙就奇啦！
倫敦金騙案「交投」活躍，防不勝防，咪以為受害嘅只係思想單純嘅無知婦孺，就算係投資老手都隨時中招。早前之嘛，有騙徒利用內地人對香港金融中心嘅信任，專門向內地豪客埋手，一單騙案動輒涉及千萬元，再咁落去，香港容乜易由金融中心變騙案中心o架，到時唔只丟架，直頭大鑊添呀！
講開又講，法例漏洞百出，當局執法不力，香港何止倫敦金騙案多，消費騙案仲多。健身、美容、音響、藥材、參茸海味……消費陷阱處處，黑店梗有一間喺左近，咁搞法，購物天堂嘅招牌遲早被人當柴燒嘅咋。
一句講晒，如果當局唔想金融中心招牌失色，唔想購物天堂美譽受損，快啲堵塞法例漏洞，嚴厲打擊黑店。話時話，納稅人交咗稅，港產官僚唔做嘢，算唔算係一種行騙呢？