「飛流直下三千尺，疑是銀河落九天」，咁嘅場面梗係壯觀喇，不過若果直下三千尺嘅唔係銀河，而係污水，咁就掃興嘞。嗱，尖沙咀香港藝術館就係咁喇，污水如瀑布，搞到唔少藝術品遭殃，簡直丟架。
話說尖沙咀香港藝術館正舉辦一場名為「原道——中國當代藝術的新概念」展覽，展出三十幾位中港台及海外華人藝術家嘅繪畫、漆器及陶瓷作品。尋日熱帶氣旋警告啱啱除低，雨勢持續，展館二樓天花突然漏水，大量泥黃色污水好似瀑布咁急瀉而下，多件人像瓷器藝術品即時中招，都咪話唔狼狽。
堂堂國際都會嘅藝術館上演現實版「水漫金山」，藝術品「屍橫遍野」，不忍卒睹，你話係咪失禮死人吖。話時話，好彩今次遭殃嘅係陶瓷展品，損失有限，大吉利是講句，萬一畀污水「毀容」嘅係達文西名畫，又或者係莫奈同梵高嘅真迹，咁就認真大件事嘞，香港隨時被視為同摧毀巴米揚大佛嘅塔利班一路貨色，咁就唔只丟架咁簡單喇。
藝術品淪為豪雨犧牲品，一日都係嗰班既冇料又無能嘅港產官僚附庸風雅，眼高手低，未做好周全準備。
係人都知，港府高官出晒名不學無術又鍾意附庸風雅，所謂發展文化藝術一貫功利先行，只係掛住為自己臉上貼金，人有我有，根本冇考慮有冇必要，可唔可行，更加懶理基層市民需要。
最典型莫過於西九文化藝術區，前朝曾蔭權爵士政府好高騖遠，奢言要將西九打造成可媲美英國南岸、西班牙畢爾包嘅世界級文化區，點知搞咗咁多年，大筆公帑已經揼咗落鹹水海，到依家仲十畫未有一撇，基本上仲係爛泥地一塊，四十公頃土地繼續喺度曬太陽。更不堪嘅係，因為工程延誤，西九項目出現嚴重超支，要不斷加碼，隨時變成無底洞，都唔知點收科。
西九工程延誤搞到一鑊泡，急就章引入嚟充撐場面嘅所謂藝術品更加得啖笑。大家一定記得前排惹起極大爭議嘅「M+進行︰充氣」展覽，部分展品不倫不類，古怪騎呢。好似嗰坨望落似足吹氣大便嘅物體叫做「複雜物堆」，被網民鬧到爆，形容係影響市容嘅一堆「爛屎」。
計功夫茶話齋，港產官僚唔識貨又要扮有料，同用名車、名錶、名包炫富嘅內地暴發戶根本冇乜分別，結果咪一再出醜囉。嗱，咪話功夫茶唔提醒，港府發展文化藝術一味葉公好龍，西九文化區遲早變大白象嘅咋。