去過將軍澳都應該知道，住過將軍澳都應該清楚，呢一個「堆填區街坊新市鎮」隨時隨地飄來一陣陣中人欲嘔嘅古怪異味，臭不可耐嘅高峰期甚至令人產生眼睛乾澀嘅不良感覺。雖然地產發展商賣口乖話空氣清新到心曠神怡啫，之不過人哋住嘅係區外豪宅呀，個人意見唔代表客觀事實。
簡單咁講，堆填區困擾咗將軍澳居民好長一段時間，本來諗住捱多幾年就飽和停用，到時守得雲開見月明，終於唔使再同發出坑渠惡臭嘅垃圾為鄰。點不知好衰唔衰，環境局局長黃錦星話喎，有必要擴建三個堆填區，包括將軍澳、屯門以及打鼓嶺。一聽見咁晴天霹靂嘅噩耗，將軍澳居民當然如喪考妣啦，反對聲音如雷貫耳之餘，更加有人做出相當激烈嘅行為，又集體絕食，又剃頭抗議，又向相關高官嘅海報肖像掟雞蛋。
識時務者為俊傑，政客最怕犯眾憎，喺呢一個群情洶湧嘅情況之下，立法會之內唔止泛民主派反對擴建堆填區，就算民建聯都唔敢再做保皇黨，擴建將軍澳堆填區肯定唔夠票通過。於是乎咯喎，明知勉強冇幸福嘅特區政府再一次頭耷耷打退堂鼓，鳴金收兵決定撤回撥款申請。
呢嗱嗱嗱，失民心者失天下，官老爺如果識得順應時勢掌握民情，點會淪落到撞板多過食飯嘅窘境呢？擴建堆填區大計其實衰過唔止一次o架啦，前朝曾蔭權政府嘅過氣局長邱騰華唔知黐咗邊條筋，居然打郊野公園主意，話要將清水灣五公頃土地納入將軍澳堆填區範圍。由於呢一個有違保育原則嘅春秋大夢實在過於荒腔走板，結果立法會議員好似扑傻瓜咁樣將邱局長扑低。
新官上任嘅黃錦星走唔出前任者嘅舊思維，再一次提出擴建將軍澳堆填區，雖然話會資助垃圾車改裝成密封式，另外立例規定將軍澳只接收建築廢料，以解決垃圾造成嘅臭味問題，之但係當地居民唔係容易受騙o架，梗係誓死反對啦。
其實計功夫茶話齋，擴建堆填區係本末倒置嘅做法。喂，環境局又未做好源頭分類，又未做好垃圾徵費，焚化爐只聞樓梯響，連膠袋稅都未達到寓禁於徵嘅預期效果，淨係獨沽一味話要擴建處理垃圾嘅堆填區，咁嘅思維根本就係垃圾。
話時話，環境局可能係成個特區政府之中最應該送去堆填嘅廢柴衙門，莫講話處理垃圾搞唔掂，空氣污染更加係束手無策，引入電動車唔湯唔水，回收玻璃樽流於空談。總而言之，環境局蹉跎歲月一事無成。
環境局表現得咁鬼死垃圾，功夫茶唔反對將局方人員捉去循環再造囉！