救護車嘅英文係乜？正確答案當然係Ambulance啦，不過國內同胞有一個更加抵死嘅英文名稱，叫做「俺不能死」。顧名思義嘞，坐上或者瞓上救護車嘅用家，最殷切嘅願望就係不能就此死去。
既然係俺不能死，救護車嘅神聖任務梗係救死扶傷啦，仲要係十萬火急爭分奪秒嗰隻，否則錯過咗同死神拔河嘅黃金機會，傷者隨時變死者。功夫茶想講嘅係，俺不能死唔應該係一齣剝花生睇好戲嘅表演節目，冇理由安排九唔搭八嘅觀眾作為座上客。
消防處救護員會總幹事屈奇安係咁講嘅，救護工作千變萬化，有可能面對恐怖場面，以往曾有隨車觀察嘅人暈倒，令救護員要多救一人。屈奇安嘅意思係話，消防處推出計劃令青年人多認識救護服務係好構思，不過佢質疑是否需要實地觀察前線工作，希望處方優化計劃。
如果大家唔係好明屈先生講緊乜乜東東，不如回顧一下消防處嘅偉大構思啦。為咗響應特區政府嘅「家是香港」運動，消防處籌辦「救護先鋒隨車觀察計劃」，邀請十三個青少年制服團體嘅十四歲或以上會員參加，名額三百個，於八月十九日至九月一日期間，喺十三間救護站每人跟隨一輛救護車，朝九晚五觀察一日。消防處話喎，希望參加者拓闊視野，了解救護工作以及慎用救護服務。簡單咁講，消防處安排細路哥做跟車仔，全程直擊救護過程。
之不過問題係，救護過程可能血肉橫飛，可能危機重重，可能兒童不宜，更加可能侵犯私隱。舉個例吖，如果大吉利是財爺曾俊華再一次心臟病發必須叫白車緊急送院，你估鬍鬚曾願唔願意有一個三唔識七嘅小朋友全程（目及）到實一實吖嗱？
十四歲以上青少年絕大部分係乳臭未乾嘅中學雞，佢哋又冇經過專業訓練，又未見過血淋淋嘅大場面，冇辦法提供助力之餘，更加有機會成為妨礙救援嘅阻力，實地觀察前線工作隨時搞出一個大頭佛，即使冇因為恐怖場面而嚇到暈倒，淨係佔據咗白車一個座位已經頭痕啦，家屬未必可以陪傷者上車送院喎。
消防處救護員會主席陳仕祺同樣質疑呢一個隨車觀察計劃，佢話救護工作有一定危險性，如果接載嘅病人患有高傳染性疾病，跟車嘅青少年都有可能受到感染o架。
所以話啫，官老爺一旦奉迎上意，隨時玩殘下屬，如果唔係消防處高層為咗擦鞋而推出呢一個中學雞跟車構思，前線人員都唔會嚇到傻咗啦。功夫茶如果係救護人員，一定會提出反建議，不如容許小朋友做消防處處長陳楚鑫跟車好過啦！