活到老，學到老，自我增值無疑係值得嘉許嘅，正如功夫茶都想學揸飛機，衝上雲霄不知幾鬼爽。之不過咁，如果學揸飛機有必要唔返工一年，功夫茶絕對唔敢攞十二個月有薪假期囉，頂多停薪留職，以免畀人話呃飯食。
問題係一樣米養百樣人，功夫茶咁諗啫，唔代表全人類都係咁諗，尤其係以公帑出糧嘅公務員，佢哋特殊構造嘅腦袋好多時與常人有別。就好似衞生署助理署長蔡美儀咁吖，佢話要讀書喎，佢話要放假喎，佢話要接受大律師培訓喎，竟然唔係停薪留職，而係申請一年有薪假期，即係唔返工照逗一百六十萬元高薪。更加匪夷所思嘅係，人哋申請啫，上司可以唔批吖嘛，點不知衞生署高層真係開恩批准喎，百幾萬就咁畀咗一個冇上班嘅員工。
呢件事曝光之後引起全城嘩然，特別係打工一族咬牙切齒，恨不得自己都有權請一年有薪假期。衞生署眼見群情洶湧，於是狡辯嘞，佢哋話近年前線執法屢遇法律挑戰，又要因應國際法規修訂法例，有必要栽培具有法律及衞生專業嘅員工，向部門提供法律意見。
「東方報業民意調查」結果顯示，對於衞生署批准一年有薪假期，四成六受訪者直斥署方浪費公帑；兩成五不滿公務員高薪厚祿仍然不務正業；一成六指摘事件破壞公務員形象。
話時話，蔡美儀事件始於去年五月，當時嘅衞生署長係尚未執包袱嘅林秉恩，係唔係呢一個準退休人士臨別秋波，送出一個順水人情呢？四成受訪者認為審計署應該介入調查；兩成九擔心開壞先例，政府其他部門爭相效法；兩成四質疑林秉恩巧立名目假公濟私。
呢嗱嗱嗱，現任食物及衞生局局長高永文似乎都想收拾爛攤子o架，佢承認呢件事引起爭議，考慮日後衞生署如果再有員工接受培訓超過半年，是否仍然受薪要問過食物及衞生局常任秘書長。換言之，衞生署唔能夠繼續自把自為，必須向上級請示。
關於衞生署有必要栽培大律師員工嘅講法，上述調查結果亦顯示，大部分受訪者唔接受署方解釋，三成八直指冇可能每個部門都培訓大律師；三成五認為政府部門已有律政司支援，衞生署理由牽強；一成七覺得根本冇必要，做法多此一舉。
其實成件事嘅是非曲直一字咁淺，冇返工就唔應該白逗人工，講完。若然公務員一個二個以讀書進修作為理由，一個二個唔返工一年半載照樣支薪，仲成世界嘅？既然民意認為審計署應該介入調查，咁就麻煩審計專員出手啦，防止公僕浪費公帑犯眾憎吖嘛！