政情：「篤誠惠民」放封面 曾厚顏
本報接連踢爆煲呔曾以權謀私、貪得無厭，乘坐富豪遊艇同私人飛機旅遊，仲密謀退休後租用富商名下嘅豪裝大屋，引起全城怒吼，今日就有多個團體遊行，要求煲呔曾問責下台。但日前出版嘅新一期《公務員通訊》，封面竟係煲呔曾嘅題字「篤誠惠民」，真係厚顏無恥至極，應寫成「篤貪惠己」就差唔多，即係忠於貪婪，惠及自己咁解。
無獨有偶，《公務員通訊》係由公務員事務局負責編製嘅，該局局長俞宗怡（D姐）早前先至大義滅親，高調發稿詳述公務員嘅防貪守則，暗寸煲呔曾嘅操守連基層公務員都不如。今次佢將煲呔曾嘅提字放上封面，唔知係純粹巧合，定係故意再寸煲呔曾口不對心呢？不過，相信對於一直奉公守法、連利是仔都唔敢收多封嘅基層公務員嚟講，收到呢份通訊，肯定會成本燒咗佢都似！