政情：白鴿派尹兆堅選超級區會
民主黨（白鴿黨）尋日就立法會超級區議會人選進行內部諮詢，以該黨四十七個區議員計，應該可以派兩個人入閘，最後內部投票結果出人意表，由前排嚴打種票事件嶄露頭角、日前拉大隊去廉政公署舉報煲呔曾以權謀私嘅葵青區議員尹兆堅，以廿一票高票當選。排第二係得十六票嘅涂謹申，反而傳聞最想參選嘅馮煒光就只得五票，排名尾二。
白鴿黨話咗要培養第二梯隊好耐，之前亦講過有意出選超級區議會嘅黨主席何俊仁，今次就讓新人去競逐。今次結果都好符合白鴿黨舊人帶新人嘅理念，而今次尹兆堅嘅得票仲高過阿涂，反映黨員對佢嘅肯定絕對不遜於舊人。不過，正所謂有人歡喜就有人愁，前排喺台灣聲稱被打嘅馮煒光，只得五票，名落孫山。相對港島南區新星羅健熙都有七票，而鐵頭仁退選讓賽都有三票支持。