中環出更：名醫高官 聖誕要開工
醫療專業人士協會日前舉行年度盆菜宴，一眾名醫同高官齊現身，與逾千位長者提早做冬。協會主席江明熙（Bernard）、獲邀主禮嘅食物及衞生局局長高永文、香港大學校務委員會主席梁智鴻（金刀梁），喺台上影完大合照後，金刀梁竟然直接喺高台上跳落地，動作矯捷利落，點睇都唔似有七十幾歲。
金刀梁話，自己冇刻意做運動，但每日都會行好多樓梯，皆因佢性格好心急，冇耐性等（車立），於是喺醫院行上行落，運動量都幾大o架。問佢聖誕會否外遊？佢就話寧願留港消費，事關旅遊旺季，去邊都咁多人喎，況且港大現正物色新校長、副校長同兩個院長，佢更加行唔開，到時一家人食餐飯慶祝。
做官之後忙到甩轆嘅高永文話，今個聖誕都要在工作中度過，剛剛開完會討論對醫學美容嘅規管，之後仲有私家醫院、骨灰龕、中醫藥等議題，排住隊要處理，真係每事忙。高永文大仔高偉琛（Koel）都有出席，佢再接再厲捐出珍貴雀鳥相片製成月曆義賣，每個只售三十元，大受歡迎，而截至當晚，大會已經成功籌得二十萬元。
江明熙做義工減壓
Koel話，近來為咗準備港大醫科考試，少咗時間影相，但依然定期跟香港觀鳥會去觀鳥，佢笑言，女仔鍾意行街買嘢紓緩壓力，佢自己就選擇賞鳥減壓。至於Bernard就透過做義工減壓，佢話做醫生壓力大，平時同太太好享受做義工帶來嘅樂趣，而今次佢特意為活動訂造一批超薄超輕嘅保暖內衣送畀長者，太太Amy仲做埋義工支持佢添。
卓妮