政情：預算案諮詢網打唔開
新一份財政預算案明年二月廿三日出台，財政司司長鬍鬚曾開始諮詢各界意見，佢仲喺特區政府嘅facebook專頁「上亞厘畢道」放咗條諮詢連結。不過，個網頁連結登咗一個鐘多啲，即時畀網民踢爆係一個「死結」，網頁無法顯示。諮詢一開波就甩轆，就係呢個政府做嘢嘅寫照。
今年嘅宣傳片叫做「如果我是財爺」，鬍鬚曾喺片末呼籲大家上諮詢網頁發表意見，有網民按下專頁上嘅連結，點知開極都開唔到。後來有眼利嘅網民發現，原來呢個問題係出咗喺連結「www.budget.gov.hk踴躍發表」嘅寫法上，事關個連結根本無「踴躍發表」四個字，故此將四個字包括到連結之中，自然開唔到啦！
事後特區政府更正番呢個手民之誤，但係有網民極為不滿，炮轟「垃圾狗官」。其實特首辦早前先至請咗兩位名為項目主任嘅facebook專員，專責管理「上亞厘畢道」呢個facebook專頁，點知又爆出呢次大頭蝦錯誤，咪更加令人覺得政府亂使錢請人！