政情:公職王又接新公職

「公職王」陳智思(Bernard)水蛇春咁長嘅公職履歷,以後又多一項,就係接替鄭維志,出任司法人員薪俸及服務條件常務委員會主席,任期兩年,由下月一日起生效。加埋呢個新任命,Bernard現時同係五個法定組織嘅揸弗人,「公職王」稱號名不虛傳。

屈指一數,Bernard任主席嘅公職,現時有可持續發展委員會主席、古物古蹟諮詢委員會主席、活化歷史建築諮詢委員會主席同嶺南大學校董會主席,瓣瓣都要落手落腳做實務,依家又多一項公職,Bernard係咪應付得嚟㗎?點知Bernard話,論公職數量,其實已經少咗嘞,政府委任公職有「六六規條」,即同時唔可以兼任超過六個,同一個公職唔可以坐多過六年,佢以前嘅公職數目係啱啱好填滿晒㗎,即係同時身兼六職㗎。

Bernard話,做公職,開會唔係大問題,反而依家做古物古蹟同活化歷史建築,成日都要外出見環保團體,先最佔據佢嘅時間。

Money18新功能「18好路數」為你預測心水股票升跌機會率