政情：女童軍爭莊好睇過戲
「告密」可能係女童軍總會嘅新精神。該會副總監彭徐美雲同名譽副會長李周美枝邊個當選女童軍總會總監仲未知，但尋日有人秉承女童軍日行一善精神，自行義務幫大家搜刮戰事情報，向本報提供「內情」線索，一個指現任總監邊陳之娟設宴，為李太拉票保地盤，一個則暗示剛辭任總會副會長嘅教育局局長孫明揚太太鍾小芬係整個「奪位」陰謀嘅幕後黑手，令呢場一姐之爭儼如女童軍版「金枝慾葉」，劇情好緊湊。
我哋尋日報道，香港女童軍總監之位問題鬧得滿城風雨，超齡嘅邊陳之娟鐵定明年四月卸任，女童軍總會將於下月八日破天荒出現投票選舉新一姐嘅「爭莊」盛況，豈料事件仲有續集，報道出街後，尋日下午不約而同有兩瓣人向我哋報料，競逐一姐嘅彭太同李太、倉皇卸任嘅邊太，以至不久前才離開女童軍總會嘅孫太，全部被捲入呢個漩渦。
其中一封署名「一群總監」、貼住深圳郵票嘅掛號告密信矛頭直指孫太，指女童軍出現百年一見嘅爭位現象，聽聞係「有乾媽（某局長夫人）處處為乾女兒鋪路」，又指孫太係近月女童軍內部風波嘅策劃者，同總會職員及數位總監「一起搞陰謀」，真係講到似層層，情節精彩過電視宮闈片集。根據信中上文下理，呢位「乾女兒」最有可能係指突然報名參選總監嘅彭太。
傳邊太撐李周美枝
另外，一位自稱女童軍總會職員不約而同亦喺尋日報料，話就本報尋日嘅報道提供補充資料，指邊太喺尖沙咀一間酒店搞聚餐，邀請所有有權投票嘅女童軍高層出席，目的為李太拉票，但就無請另一位候選人彭太。女童軍總會發言人就話，尋日係有會員聚會，但邊太唔係搞手，李太確有出現，但彭太就因為事忙冇到，佢堅稱呢個唔係拉票活動。
一姐之爭演變成內部兩邊陣營角力，我哋打電話問孫太，佢高呼冤枉，話自己無契媽，亦無契女，更加無諗過爭位，女童軍本來係教導班女孩子做一個對社會有貢獻、敢承擔嘅地方，依家變成咁嘅樣子，令佢好傷感，佢辭晒女童軍所有職務，就係想耳根清淨，遠離煩擾，佢希望放箭人唔好再搞佢，亦無謂再為一姐之爭起爭拗，選舉但求公平公正，光明正大拉票，邊個輸贏都無所謂咁話。