廣東俗語不可廢，皆因其傳神。好似「盲公竹，督人唔督己」便十分好用。政府施政，周不時難為市民而自己經常逍遙法外，正一「盲公竹，督人唔督己」，老朽指嘅係「停車熄匙」立法，有市民接二連三投訴政府車輛於執勤期間未有停車熄匙，質疑「停車熄匙」立法係「只許公僕歎冷氣，硬要百姓車熄匙」。
香港氣候，七至十月多持續高溫，新界北區氣溫尤其酷熱難頂，停車熄匙，車廂內溫度驟升至四十度，職業司機停車熄匙，真係搵鬼搭你部車，除非乘客欣賞並享受「坐的士送桑拿」，否則情願改搭其他冷氣交通工具！
好心環境局局長邱騰華唔好咁低Ｂ，一而再應運輸業界要求，西裝領呔的去試坐停車熄匙的新界的士，搞到身水身汗，咁嘅政治騷，一次出醜，其可再乎？幾十萬元月薪上演啲咁嘅嘢？嘥料啲啩！
當然，世上常有猛人政客行「盲公竹，督人唔督己」，非獨邱騰華局長一人。最熱辣新鮮的例子莫過於美國的貧窮人口急升近四百萬，創五十一年來新高，換言之，美國每七人有一個貧民；奧巴馬的「改變」未為美國夢添色彩，而是把美國人變得黯然無光！難怪惹來政治人物的狠批：現在大部分的美國人民每天都在勒緊褲帶過日子，而奧巴馬一家花錢如流水，用人民的血汗錢，過着如同國王和王后般的生活。
堂堂大國領袖，搞唔掂經濟民生都惹來如此冷嘲熱諷，奧巴馬上任年多明顯蒼老了；邱局長被指無能，一味演停車熄匙鬧劇，那又算得甚麼？也許上天感其戇，再演多兩次鬧劇，說不定車廂內溫度突然下降！