政改通過無助煲呔曾的民望，最新民調顯示佢已連續第五次不合格，反對佢出任特首的比率亦創歷史新高達百分之五十二。喺立法會本年度最後一次答問大會上，煲呔曾話會集中精神改善民生，呢啲係佢「做好份工」最基本嘅要求，但佢一味等住退休，民生經濟就少理，如今剩番兩年，試問又做得乜嘢出來？
煲呔曾最叻就係吹水唔抹嘴，反正說了算就大覺瞓；被問及民生，佢又話十月施政報告「交代」，焦點對準三大範疇，即解決低收入家庭生活困難、房屋政策以及老人福利。嘩！唔通佢有三頭六臂，剩番嗰兩年可以令經濟起飛？發夢見到新加坡樣樣彈甩香港，第二季經濟增長近兩成，旅客入境破紀錄，人哋靠嘅係勵精圖治非吹水。
反觀香港，作為火車頭的煲呔曾，改善民生只空口狂呼「起錨」，自己卻準備「一簑煙雨任平生」，空頭支票開完一張又一張，「六大產業」、「十大基建」、「黃金十年」、「想窮都難」的噴口水花；本港窮人成一百二十萬，月入低於四千元的貧窮家庭超過十九萬戶，在職貧窮只見惡化……煲呔曾如何在任內改善？
新加坡有今日嘅成果，皆因人哋如水上之鴨子，我哋見到佢浮游碧波、舒暢悠然，其實水下的鴨子雙腳卻不停的扒水奮進；香港陸上行舟，起錨不得其法，徒見拋錨、超錯之餘，更造成噪音滋擾，令人煩厭不安！
煲呔曾既然管治無能，老朽禮貌上祝福佢夢想成真：年年歲歲望中秋，歲歲年年霧雨愁。涼月風光三夜好，老夫懷抱一生休。煲呔曾真有心改善民生，來世投胎做八爪魚保羅吧！