政情：工會搶灘頭 新東選區亂
仲有兩年就舉行新一屆立法會選舉，各政黨已經密鑼緊鼓部署，務求爭取更多席位喺議會中發聲，工會亦都唔執輸，除咗喺勞工界別爭出線外，亦擴大戰線至直選。工聯會一早諗住安插現任代表勞工界功能組別嘅葉偉明落新界東直選，職工盟又話諗緊出戰新界東，睇嚟新界東嘅選情將會七國咁亂。
職工盟啱啱選咗新一屆執委會，由潘天賜做主席，今年又係職工盟成立二十周年，尋日就同傳媒見下面。職工盟秘書長李卓人一直扎根新界西，今年想加多一區，派人出戰埋新界東，但係人選就未定，阿人話內部都只係作出初步討論，未有定案。
其實，現任副主席郭紹傑喺○七年曾經出選區議會沙田廣康選區，但最終落敗，阿人都承認職工盟選舉嘅弱點係無樁腳，揀選新界東純粹係因為多打工仔，完全無考慮過可能會同對手工聯會嘅葉偉明硬撼。佢哋估計，加多一區最少要多八十至九十萬元開支，阿人話就話做多啲月捐增加收入，同埋開多啲收費課程，改善收入情況。