中環出更：蔡冠深夫婦陪愛女食快餐

貴為「海產大王」蔡繼有接班人嘅中華總商會會長蔡冠深（Jonathan），向來識飲識食，本身經營日本料理外，仲經常同太太蔡關穎琴（Janice）周圍捐窿捐罅搜尋美食。不過，卓妮上周六就見佢兩公婆同愛女去金鐘廊間Delifrance法國餐廳食晏，當時已食到接近尾聲，大家睇住個iPhone當甜品，你一言我一語，樂也融融。
蔡冠深（左）好開心咁介紹自己個大女，但佢愛女就好怕醜唔肯望鏡頭。 （何偉鴻攝）
蔡冠深（左）好開心咁介紹自己個大女，但佢愛女就好怕醜唔肯望鏡頭。 （何偉鴻攝）

望女兒入港大

Delifrance嘅食物及價格較大眾化，幾十蚊就有交易，Jonathan兩公婆食慣好嘢都啱食？原來係遷就愛女。Jonathan話，趁放假抽時間同大女外出行街同食吓嘢，因為大女鍾意食意大利粉同Pizza，所以就去幫襯Delifrance。Delifrance嘅意粉種類都唔少，好似黑椒雞肉扁意粉、蘑菇蟹肉扁意粉等，仲有各式麵包和咖啡，簡簡單單的快餐都係唔錯嘅選擇。

Jonathan講完食嘢，就介紹愛女畀卓妮認識，但佢囡囡好怕醜，影相唔肯望鏡頭。Jonathan愛女現時讀緊中六，明年就升讀中七，之後繼續留港升讀大學。Jonathan話，香港係個讀書好地方，所以毋須到外國讀書，只係希望女兒入到香港大學。至於會否要求女兒修讀工商管理，將來幫手打理家族生意，Jonathan就話女大女世界，等個女自己諗喎！

不過，Jonathan嘅大仔就去咗加拿大讀大學，雖然係咁，佢早前都送咗大仔去瀋陽一間企業做實習生，執頭執尾捱吓苦，兼且學習內地嘅人事脈絡。唔知Jonathan係咪因應港人北上發展嘅大趨勢，所以希望大女留港讀書，可以更加貼近中國嘅龐大市場呢？

蔡冠深（左二）與太太蔡關穎琴（左三）陪大女（右一）去Delifrance食意粉，食到尾聲齊齊高興玩iPhone。
  • 蔡冠深（左二）與太太蔡關穎琴（左三）陪大女（右一）去Delifrance食意粉，食到尾聲齊齊高興玩iPhone。
保良局蔡繼有學校新校舍早前開幕，蔡冠深（左三）與太太蔡關穎琴（右三）全家總動員去撐場，左一就係大女。（資料圖片）
  • 保良局蔡繼有學校新校舍早前開幕，蔡冠深（左三）與太太蔡關穎琴（右三）全家總動員去撐場，左一就係大女。（資料圖片）

卓妮

Money18新功能「18好路數」為你預測心水股票升跌機會率