政情：亞視賽馬日盛品儒「鋪草皮」
亞視股權爭拗不斷，但無損高層耍樂心情，尋日喺沙田馬場搞咗個「亞視賽馬日」，王征堂弟兼亞視執行董事盛品儒，以及早前被指權力遭架空嘅亞視行政總裁胡競英，齊以主人家身份亮相。盛生同胡小姐都謙稱唔識賭馬，為湊熱鬧小注怡情，結果盛品儒輸錢，胡競英就有小小斬獲。因股權問題拗到火紅火綠嘅亞視兩大股東查懋聲、蔡衍明，以及高調話要入主亞視嘅內地商人王征，全部冇現身。
陳南祿履新前睇世博
盛品儒係馬場初哥，睇見第一場大熱「錢照贏」呼聲高，即時買咗五百蚊獨贏，咁啱得咁橋，胡競英都睇中呢隻，分別投注一百蚊獨贏同位置，仲買埋三重彩。最後「錢照贏」跑第二，盛生投注「鋪草皮」，反而胡小姐執番少少。
同日仲有馬會大董陳南祿，Philip隻「時時有機」出戰，點知影相輸咗個馬鼻，跑第二，袋番十萬零六千幾蚊獎金。Philip呢排財星高照，七月中過檔恒隆，人工三級跳。佢話返新工前有兩星期空檔，一於陪太太、囡囡去上海睇世博。