綠軍勢入Final
塞爾特人主場再展霸氣！前季NBA總冠軍波士頓塞爾特人殺入季後賽後愈戰愈勇，繼上圈淘汰奪標大熱門騎士後，來到東岸決賽亦所向披靡，一口氣連贏魔術三場。昨日回師主場的「綠軍」更愈贏愈輕鬆，以94比71大勝魔術23分，重返總決賽只有一步之遙！
同首兩回合一樣，「綠軍」昨日甫開賽即急攻，令魔術由頭到尾都陷於劣勢，至第四節更一度落後32分，最後慘敗可謂意料中事。塞爾特人「三巨頭」今場發揮唔錯，各有雙位數得分，其中皮雅斯有15分同9個籃板。不過講到Sharp醒，始終唔及格連戴維斯同朗度兩位同樣於86年出世嘅80後球員，當中「Big Baby」格連戴維斯後備上陣射入全場最高17分，至於朗度就交出11分同12次助攻嘅「雙雙」成績。
「魔獸」低沉打定輸數
由於一早奠定勝局，塞爾特人嘅皮雅斯寸爆，喺完場前20秒已離場走入更衣室，仲一路同球迷講：「贏多一場，贏多一場就搞掂啦！」
魔術昨仗表現欠佳，「魔獸」杜域侯活得7分，劉易斯更只得4分，打得咁沉好似放棄晉級一樣。雖然魔術眾將賽後揚言會力爭到底，不過NBA歷史上從未有球隊在落後0比3的情況下能夠反勝，故明日Game4塞爾特人可望再下一城，提早晉級總決賽！
本報綜合報道