政情：任亮憲盼代泛民出選
隨着匯賢智庫成員陳岳鵬過檔做特首辦特別助理，佢嘅南區區議員議席就要搞補選填補空缺，匯賢智庫當然想由自己人嚟接手啦。不過泛民主派對呢個議席都虎視眈眈，正積極考慮嘅有社民連「維園阿哥」任亮憲同埋公民黨。任亮憲尋日仲建議，不如搞一次泛民陣營內嘅初選武林大會，用票數決定邊個代表泛民參戰喎！
任亮憲尋日出席完《城市論壇》之後話，雖然社民連主席陶君行已經表示支持佢參選，但要過埋社民連行政委員會嗰關，加上公民黨都有意派人參選，所以暫時未知泛民由邊個出選，一切要等下月初嘅協調會議傾完先可作實。佢仲建議搞一場公開辯論，邊個贏咗就邊個代表泛民。
至於匯賢智庫嗰邊，理事會主席葉劉淑儀話仲未決定邊個出選，遲啲會同智庫內有參選經驗嘅人傾吓，同傳聞考慮派人出選嘅自由黨都會協調。睇嚟泛民同建制派仲盤算緊派咩人參選，大家惟有拭目以待啦！