政情：政改辯論騷隨時爛尾

自「五區公投」曲終人散後，特區政府派高官落學校推銷政改，煲呔曾又單挑余若薇同自己辯論，好似動作多多咁。不過前者碰到一臉灰，後者更加畀各個陣營鬧到飛起。譬如全國人大常委范徐麗泰就揶揄呢次係「開埠以來的壯舉」，孰好孰壞好難講，仲暗批煲呔曾厚此薄彼，只請余若薇而唔請民主黨，跟住工聯會同自由黨嘅議員都出嚟大鬧。

「無間道」暗助民主派？

尋日更加有講法話，煲呔曾以為「公投」投票率低就可以乘勝追擊，因住冇着數之餘仲返轉頭攞番自己條命！事關宣布搞辯論之後，無建制派表示贊成，肯定喺事前無同過建制派取得默契，就連政府錄音機、政制及內地事務局局長林瑞麟都話無奈同唔關佢事，而且呢場辯論好明顯同最近中央與普選聯「有得傾」嘅氣氛下散發咗啲混亂嘅訊息，所以有人話，辯論如果最後爛尾，都係好自然嘅發展。

煲呔曾唔知有意定係無意眼高手低，已非首次，除咗今次刻意抬高余若薇，近嘅有五一六立法會補選前夕出新聞稿話唔投票，客觀效果係激發咗一啲選民去投票，遠嘅有○八年立法會選舉前一手炮製擴大問責制風波，洞察世情嘅「金勞詹」詹培忠當時話，擴大問責制單嘢令保皇黨失分、民主派得分，影響○八年立法會選舉，金勞詹當時已經懷疑煲呔曾係民主派嘅「無間道」，如果同一思路，今次都係如出一轍啫。

奇怪嘅係，行政會議召集人梁振英尋日成為呢件事件撐煲呔曾嘅唯一人，佢為辯論不設現場觀眾及無其他黨派參與，解畫話因為時間問題所以有咁嘅安排，成個不知情嘅路人甲咁款，唔通佢唔敢再同煲呔曾唱反調，尋日要立此存照？