政情：普選聯造勢逼交人撐場

早前普選聯開會，都係十幾個核心骨幹成員參加，但係普選聯安排咗聽日下晝三點，喺明愛九龍社區中心搞個團結大會，諗住搵齊十三個成員團體嘅人腳，聚首一堂造吓勢提高吓士氣，順便向大家交代佢哋之前做過啲乜。

唱歌播片 似嘉年華

不過，睇番佢哋嘅流程安排，短短一個鐘多啲嘅團結大會，內容非常弱雞，淨係唱三首勵志歌同睇一條《民主進程》嘅短片，就已經用咗四十五分鐘；之後再搵學者分析吓依家搵普選聯嘅對話策略，呼籲大家參加五月二日嘅反對政改方案大遊行，同埋大家一齊推吓大氣球造勢就玩完，整個活動似嘉年華多過團結大會。

有民主黨成員就表明杯葛團結大會，話依家風頭火勢，無理由再浪費時間搞呢啲唱歌跳舞嘅聯誼活動，應該認認真真坐低諗對策。面對團結大會可能人丁單薄，普選聯惟有出招叫每個團體吹雞湊人頭，以免到時出醜。民主黨要認頭二百人，民協就一百，教協、職工盟、街工同社工總工會都要各自認頭五十人，務求湊夠五百人出席團結大會，好好睇睇叫做營造吓氣勢。

普選聯呢招趕鴨仔會唔會成功，聽日自有分曉。不過即使湊夠人頭，都未必真正做到團結。事關立法會討論二○一二兩個政改方案嘅小組委員會出咗暫定名單，總共有三十個議員報名，不過泛民代表僅僅得嗰八個，仲要唔係個個泛民政黨都有派人參加，簡直係一盤散沙，淨係氣勢已明顯比建制派弱咗一大截。開壞咗個頭，又怎能期望有好結果呢？