政情：任達榮隱世廚神整蝦餃

原來任Sir當年去英國做「交換生」，借調到當地做警官，帶住老婆同三個細路，唔單止人生路不熟，又思鄉情切，想搵間酒樓食吓中菜都無，但係班細路話想食點心，廿四孝嘅任Sir惟有學做蝦餃燒賣，整吓整吓，最後就畀佢鑽研到整點心嘅秘技。

任Sir話，整蝦餃最緊要皮薄，嗰皮一定新鮮做，摺口亦好考工夫，唔係好易散；佢整嘅美食，連李明逵食過都讚好，睇嚟兩位警隊前高層可以嚟一個廚藝大比併，一中一西，一定好多人想試。

講番任Sir，佢話依家放緊退休前休假，做吓啲私人事務，未有特別大計，閒時就返去警隊探吓班老友，好似尋日咁，就去咗ＰＴＵ學校睇結業會操。做過ＰＴＵ校長嘅任Sir，認真念舊！