政情：張廿蚊認衰田少唔收貨

話說今次張廿蚊勇於道歉，係因為自由黨前正、副主席田少同莎姐周梁淑怡眼見「廿蚊論」大有星火燎原之勢，加上黨主席劉健儀（Miriam）星期一出嚟同張廿蚊劃清界線之後，攻擊自由黨嘅言論不跌反升，田少同莎姐驚事情發展落去會影響自由黨形象，決定快刀斬亂麻，同張廿蚊力陳利害，最後成功勸掂張廿蚊出嚟向公眾道歉賠罪。

黨員質疑Miriam處理手法

不過睇嚟佢哋逼到個人逼唔到個心，田少睇完張廿蚊嘅記者會之後擰晒頭，話佢道完歉都無補於事，張廿蚊應該就自己誤導公眾而道歉，但係佢反而話公眾誤會佢。言下之意，即呢場道歉騷係連田少呢個導演都唔收貨，不過ＮＧ都冇用，記者會無take two，講咗嘅說話就好似潑出去嘅水，冇得收番。

「廿蚊論」對自由黨造成嘅打擊唔少，張宇人難辭其咎，不過有黨員就認為，Miriam危機處理嘅手法亦好有問題。原來Miriam星期一霎時話要開記者會，黨內冇開會傾過，兩位副主席全不知情，張廿蚊唔知主席舉行記者會不特止，連畀Miriam拉去一齊出席記者會嘅方剛都唔知發生乜事。搞政治搞到獨斷獨行，冇商冇量，遲早出事。

自由黨喺○八年立法會選舉後曾經大地震，一黨變兩黨，由Miriam接手做黨主席，好多人都好擔心佢其實唔係一個政治人物，佢可以埋首審議好多草案，但係政治手腕咁多年都冇進步，今次事件，正正就係暴露咗佢最大嘅缺點。Miriam做咗年幾兩年主席無改進，個黨仍然無法凝聚起嚟，應該點行落去呢？