早產輕磅B成長路辛酸
不少父母對雙胞胎趨之若鶩，但原來部分多胞胎均有早產問題，照顧磅輕BB絕非易事，捱過關才能感受到先苦後甜。有誕下三胞胎的母親懷孕時因負荷過重令恥骨爆裂需入院待產，更提早剖腹產子，長子卻因肺部未長成兩度窒息險送命，令父母日日提心吊膽，幸及時搶救保命，最終能健康成長；亦有誕下龍鳳胎母親，因照顧一對子女「無覺好瞓」而患上輕度產後抑鬱，幸得家人支持才能渡過難關。
最輕嬰兒僅重0.6公斤
廣華醫院為慶賀東華三院一百四十周年紀念，昨日舉行「輕磅BB」家長分享會，當中最輕的嬰兒出生時僅零點六公斤，遠低於正常的二點五公斤。其中吳太的三胞胎子女屬早產「輕磅BB」，他們出生時僅重約一點五公斤，吳太坦言，懷孕期間已受盡折騰，「試過出血同嘔得太厲害而入院，仲因BB太重而令恥骨爆裂，痛到瞓唔到覺，要瞓醫院待產。」
吳太懷孕八個月提早剖腹生產，不幸長子梓朗因肺部未成熟，經常嘔奶，更兩度窒息入院，「佢試過抖唔到氣，成塊面黑晒，好彩當時喺醫院，如果遲五分鐘就可能救唔番。」子女出生初期，她情緒甚為波動又無法安眠，時刻擔心兒子長大後有後遺症，「自己嘅安危、外表完全唔理，淨係希望佢可以飲多啲奶，快啲長大。」幸現年九歲的兒子及兩名女兒均健康成長，令她終放下心頭大石。
剛於今年誕下龍鳳胎的關太亦有另一番辛酸史，現時六個月大的哥哥逸信和妹妹悅心，在媽媽肚內七個半月便急急搶閘出生，兩兄妹出生時分別重約一點六公斤及一點四公斤，但因肺部未成熟而影響呼吸，需入住深切治療部，「生完之後第一次見佢哋就忍唔住喊咗出來，佢哋太細粒，手臂只係我隻手指咁大，好擔心佢哋長唔大。」經治療後兄妹逐漸增磅，留院兩個月後便可回家。
糖尿高血壓孕婦高危
關太透露：「因為佢哋唔足月，食奶食好耐，又成日嘔奶，當時覺得好無助，甚至有少少產後抑鬱，幸好有丈夫、奶奶同媽媽幫手照顧，先至冇咁辛苦。」廣華醫院兒科部門主管吳國強醫生稱，該院每年約有四十個輕磅嬰，他們因器官未長成，腦部、肺部、心臟及腸臟等均可能出現某些毛病，死亡率更較一般嬰兒高，其中患糖尿病及高血壓的母親屬早產的高危一族，應小心留意健康及做足產前檢查。