港府尋日公布委任新一屆城市規劃委員會成員，共有六名官方及三十名非官方人士，當中有十四名新面孔，任期由四月一日起為期兩年。
最引人注目係新委任委員有年輕化傾向，早前夥拍香港青年聯會主席陳仲尼發起「香港精神大使」計劃嘅梁宏正，同來自近年備受矚目嘅「三十會」成員李律仁都係新委員，令人眼前一亮。
梁宏正係立法會議員梁君彥囝囝，現時喺家族旗下嘅新興織造廠任董事，都有幫手打理家族旗下嘅地產生意。佢入咗都會規劃小組，沙煲兄弟陳仲尼就入咗鄉郊及市鎮規劃小組。
雖然兩兄弟喺唔同組別，但佢哋正尋找失落嘅香港精神，相信佢哋同後生一代溝通冇難度，事關依家八十後成日話要保育，佢哋都應該可以喺城規會反映年輕人心聲。
至於大律師李律仁係論政組織「三十會」召集人，呢個組織由一班三十幾歲嘅專業人士組成，早前佢哋嘅成員莫宜端獲委任勞工及福利局政治助理，令到「三十會」備受矚目，所以李律仁獲政府垂青，並不令人意外。