政情：地圖王晒世博「跟蹤性收藏」
著名古物收藏家譚兆璋收集世界各地嘅地圖已經廿幾年，圖像藏量高達廿萬份，「地圖王」嘅美譽當之無愧。但原來佢除咗儲地圖外，仲好鍾意蒐集世界博覽會嘅展館銅板畫、會場地圖同紀念品。上海世博就快開幕，地圖王拉埋全國人大代表羅范椒芬，一齊成立香港各界支持上海世博聯合會，嚟緊喺德福商場將佢多年嘅珍藏公諸同好，為五月舉行嘅世博造勢。
羅太推廣世博歷史
地圖王話，佢原本只係鍾意收集唔同城市嘅古地圖，但由於舉行世博嘅永遠都係大城市，所以間接培養到佢對世博收藏品嘅興趣。佢仲自爆話，對世博收藏品沉迷程度極高，已經去到「跟蹤性收藏」嘅地步，仲話試過朝早收到call，下晝就即刻辦簽證，搭夜機去買佢嘅心頭好。
羅范椒芬就話，世博場館好大，所以希望透過香港各界支持上海世博聯合會，等大家認識世博嘅歷史多啲，出發參觀前可以做定功課喎。