政情：蔡加敏夫婿獻唱台型十足
玩具大王蔡志明千金蔡加敏（Carmen）近日再度有喜，懷上第二胎。安胎期間，Carmen堅持返公司打理家族生意，幹勁十足，前兩晚更首次同老公馬鴻銘（John）、囡囡馬靄翹首次登台獻唱。阿John初試啼聲台型十足，連老婆都話嚇咗一跳。
「香港工商專業協進會」（廿二日）喺會展慶祝成立五周年，晚宴加插才藝表演環節，來賓統統要上台露兩手。阿John係會內活躍成員之一，當然唔執輸。見佢一手抱起囡囡上台，信心十足咁攞起支咪，唱出張惠妹名曲《聽海》，聲線洪亮，太太就細細聲喺側邊伴唱。一曲唱畢後，阿John意猶未盡，再唱多一首《新不了情》，觀眾都拍爛手掌。Carmen爆料話，老公平時愛聽周杰倫嘅歌，揸車時會唱歌自娛，估唔到上台一刻都似模似樣。
同場仲有為亞視經常曝光嘅商人王征，佢向來係風頭躉，當晚請來在場一位靚女跳舞，盡顯紳士風度。