政情：促設專委會查修例風波 建制鍾國斌梁美芬鬧雙胞

自由黨鍾國斌同經民聯梁美芬提出嘅動議，都話要引用特權法成立專責委員會。鍾嘅動議係要調查衝突對整體民生嘅影響，回應社會訴求；梁就話要調查騷亂前因後果，有否外部勢力干預，甚至研究香港出現深層次矛盾嘅原因及尋找社會復合的出路，兩個「撞到應一應」，但梁之後又話內容要再修改吓，要延遲少少再交喎。

鍾國斌：要善用特權法

鍾國斌話事前有同部分黨友甚至梁美芬「打過招呼」，加上社會有好多聲音覺得立法會甚至建制派要做啲嘢，之前就話休會，依家復會就要開始着手做，要善用特權法咁話。係咪藉此幫政府降溫？佢話啱啱相反，係政府唔做立法會做！至於邊個做主席都冇所謂，最緊要真係過得到，成立到個委員會先。

民建聯陳克勤就話梁美芬事前有同該黨及其他建制派議員溝通，連啲字眼都有商量過嘅，又話因為兩個議員都係建制派，原則上就希望兩人夾埋再揀一個，但如果真係要二揀一，民建聯就傾向支持梁喎。