反對修訂《逃犯條例》嘅行動搞到滿城風雨，之後嘅《禁蒙面法》同樣爭議極大，引起社會上有唔少人關注。立法會間中都會就某啲議題舉辦公聽會，藉此等議員同官員可以聆聽公眾意見。話說《禁蒙面法規例》嘅公聽會喺尋日朝早九點開始報名，聽聞一百五十個名額喺開始報名後就火速爆滿，睇嚟仲搶手過演唱會飛喎。
公聽會將會喺嚟緊嘅星期六舉行，早前立法會就公布咗公聽會嘅資料，名額最多一百五十個，會以先到先得的原則去分配。自從立法會公布後，唔少網民就喺網上號召，呼籲市民尋日報名登記，難怪公聽會咁快就滿額啦！
雖然公聽會名額有限，兼且已經滿晒額，但有興趣發表意見嘅市民都唔使失望，因為仲可以繼續透過立法會網站，向小組委員會提交書面意見。根據立法會網站，市民就《禁蒙面法》提交書面意見嘅截止日期喺今日下晝五點，有網民都繼續作出呼籲，甚至出埋範本，方便市民提交意見。