中環出更：象哥叫錯單仲偕名被寸爆
立法會工商事務委員會尋日開會，由新主席黃定光（象哥）主持，但象哥就不時擺烏龍，一時將議員單仲偕叫錯咗做前立法會議員鄺志堅，一時又將簡稱「運房局」嘅運輸及房屋局講成「房運局」，結果被單仲偕窒番轉頭。象哥話，其實佢約咗鄺志堅，又睇緊日程，先至一時唔小心嗌錯咗啫，佢又死撐話兩位議員有啲似樣喎。其實身為主席主持會議係咪應該專心啲呢？
主持會議 烏龍百出
話說尋日各個駐外香港經貿辦事處嘅代表到立法會匯報工作，單仲偕就趁機會問吓各經貿辦在佔領行動以來有冇收到求助或查詢個案。點知象哥叫單仲偕發言時就無啦啦講咗：「下一位，鄺志堅！」雖然象哥已立即更正，但都被單仲偕寸爆：「鄺志堅冇做立法會議員好耐喇喎」認真尷尬。
及後象哥又向當局提出去台灣視察，話「房運局」等多個決策局都有組立法會訪問團去，但佢哋就冇去過，其實可以去睇下當地工商、農業、旅遊同科技發展。單仲偕就即刻潑冷水話冇興趣，想去其他地方睇創新科技多啲，仲寸象哥台灣在科技方面呢幾年發展已慢咗添。
卓妮