政情：感冒菌入侵 李鋈麟面癱
太攰真係特別容易病，東華三院前主席李鋈麟尋日戴住口罩現身，原來佢因為太多應酬，過於勞累，上星期二突然感冒菌入侵右邊面嘅三叉神經線，成塊面塌晒，於是即刻去醫院住咗兩日，依家仲未完全好番。
佢話，出事當日啱啱喺內地開會後回港，飲水時發現嘴角漏水，同事發現佢塊面歪咗少少，於是即刻睇醫生，做晒磁力共振、腦掃描等，睇吓係咪中風，好彩照晒都冇事，最後發現係感冒菌入侵三叉神經線。
冇藥食 靠針灸
佢話，兒子都曾發生同類事件，一樣冇藥食，要針灸。佢依家每日早午晚都要點艾草，整熱一個金屬器具，推鬆嘴角、額頭、顎骨底嘅穴位等位置，加速新陳代謝咁話。咁大件事，希望佢盡快康復啦！