中環出更：張國鈞突向行會申報律師會成員
行政會議處理不少政策事宜，行會成員須申報利益以免有利益衝突。身兼行政會議成員、立法會議員及中西區區議員嘅「三料」議員張國鈞（Horace），上月中突然向行會申報係香港律師會會員，唔通有咩特別事情發生，要突然補漏？
預先補漏 怕利益衝突
Horace回覆查詢時話，其實冇咩特別嘢發生，可能係同事幫佢申報定先，以免突然有咩利益衝突，因為唔知幾時會突然傾法律改革之類。不過佢話，就算個人利益登記冊冇申報，傾到有關事宜都會當場申報嘅，而且大家都知佢係律師，應該都知係香港律師會會員。佢又話，身兼好多鄉親、社團嘅會，有啲團體有時只係口頭邀請佢就加入咗，冇書面紀錄，都難以盡錄，惟有傾到時，一諗起就即刻申報啦。
不過，睇番本身係大律師嘅另一名行政會議及立法會「雙料」議員廖長江，一早已經申報係香港大律師公會會員，Horace依家才補漏申報，相比之下，真係有啲遲啦！
卓妮