政情：中學趣事 袁國勇爆高永文最叻劏蚯蚓
開講有話，醫生係揸刀搵食，所以讀書時已經常解剖動物。香港大學微生學系講座教授袁國勇同食物及衞生局前局長高永文係中學同窗，兩人亦係醫生，佢哋中學時都成日匿埋喺學校天台「開刀」，袁更大爆高最叻劏蚯蚓添！
尋日兩人出席皇仁書院一個活動時，自不然講起當年讀書趣事。原來兩人做過校內天文學會正副主席，當時校方將學會會房同天台管理權交畀佢哋，所以成日攞正牌走堂去睇星，有時多雲就喺房討論天文學。不過袁就話，以前考醫學院要識劏老鼠，間中都會喺天台「開刀」，而高劏蚯蚓最勁，「劏得好靚」喎！
袁只記得女老師名
袁又笑言，小時候學校校長同老師都係男性，後來先請女老師，但佢至今只記得女老師嘅名，尤其係經常罰佢同高永文嗰位。而高就好懷念觀測站前身係獨木舟營地，戲言細個唔識死，未識游水都扒出海，唔似得依家啲小朋友，玩乜都要簽生死狀喎！