富力R&F贏1粒升榜首

主隊佳聯元朗開賽僅7分鐘便有基斯於禁區內起腳斜出，客軍則有利安高18分鐘接應隊友妙傳左路殺入禁區起腳，皮球被陳嘉豪沒收。富力R&F幾乎於38分鐘先開紀錄，伊達右路開出角球，基奧雲尼跳頂，伏兵門前的羅振庭及時解圍。主隊補時階段亦有慕沙禁區右路起腳僅告斜出，雙方互交白卷進入更衣室。

光Sir講爭標：最緊要做好自己

佳聯元朗下半場初段便有多個黃金機會，杜馬思、基爾頓、慕沙輪流攻門均未能射破周煜辰十指關，反被富力R&F68分鐘先開紀錄，利安高接應基奧雲尼右路傳中，頭槌二傳盧均宜於禁區內凌空抽射入網。

客軍得勢不饒人，80分鐘有利安高左路禁區外主射罰球被陳嘉豪飛身救出，83分鐘迪布利左路犄角位起腳中楣，不過最終仍保住1比0勝局完場。

富力R&F主教練楊正光賽後表示，元朗是一支具實力的球隊，主場氣勢強，今場勝仗令球隊上下爭標信心大增。「光Sir」又謂︰「球隊最大嘅對手係自己，因為我哋有主動權。之前講過只需要每場都贏波，就唔需要理會其他球隊，當然會寄望其他球隊失分，但最重要係做好自己。」「光Sir」又證實林志堅受傷未能上陣，但認為其替補羅港威表現稱職。

富力R&F贏波功臣盧均宜則對射入加盟後首個入球感高興，期望球隊下輪對冠忠南區能夠保持良好心態應戰。

佳聯元朗主教練郭嘉諾稱，今季有不少發揮好卻落敗的賽事，認為球隊成功做出部署，只欠埋門一腳，對整體表現感滿意。