愛因斯坦有次為酒店信差寫下呢段說話當打賞：「平靜簡樸生活所帶來嘅幸福，遠超喺焦躁不安中所追求嘅成功。」呢張被後人形容為「快樂論」嘅紙條，最終拍賣咗一百五十多萬美元，賣家豬籠入水當然Happy喇，但快樂唔等於功名同物質，肯定係大科學家最想凡人學習嘅一課，可惜要做到就難咯。
淨係今日嘅香港咋，生老病死皆不易，衣食住行樣樣難，剛啱公布嘅全球生活成本調查，香港係亞洲區生活成本第二高嘅城市，香港人就算想過簡樸生活都唔容易，咁就難怪聯合國日前發表嘅《二○一八全球快樂報告》，香港喺一百五十多個國家及地區之中，排名繼續插水，由舊年七十一位跌落七十六位，莫講話同排頭位嘅北歐國家冇得揮，就連排名二十六嘅台灣亦遠遠比唔上，係咪醜怪吖。
其實諗落又冇乜出奇嘅，台灣雖然經濟疲軟，但起碼生活指數冇香港咁驚人，近年成為港人移民另類首選就係咁解。睇番香港，單係房屋問題已令港人頭痛，樓價租金長升長有，連劏房呎價都媲美豪宅，部分基層甚至要棲身豬欄、雞棚。最弊係港府拓土建屋無計，公屋供應嚴重滯後，市民一係上樓無期，一係唔飲唔食十九年先至買到個豆腐膶單位，連基本生活所需都變成奢侈品，有乜可能快樂呀。再講吖，香港人均居住面積「細」絕全球，連轉身透氣嘅地方都冇，唔躁至奇。近年咁多鄰里同家庭糾紛，吓吓見血，家陣知點解喇。
講真，一個地方嘅人開唔開心，睇吓服務從業員有冇笑容就知嘞。香港嘅服務從業員唔止郁啲黑面，唧都唔笑，仲有金都唔識執咁款，肯定開心極有限。再睇吓我哋嘅老人家吖，執紙皮幫補生計有之，有病唔敢睇醫生有之，咪就係生活有後顧之憂囉。如果政府有完善福利照顧長者，真正做到老有所養，佢哋又使乜活得咁辛苦吖。
講到尾，最離譜都係港府，明明財政盈餘同財政儲備雙雙創下歷史新高，正一肥到襪都着唔落，偏偏嫌貧愛富，斤斤計較，對全民派錢嘅訴求置若罔聞，一副你死你賤咁嘅樣。呢，財爺陳茂波日前同中學生會面仲大講風涼話，話好開心冇學生問佢點解唔派錢喎。好心喇，之前夠有大把市民烽煙鬧爆佢涼薄啦，又唔見佢攞出嚟講嘅。
冇計嘞，官員無能，政客無良，中央所託非人，社會愈搞愈亂，香港人點會快樂。最荒謬係林鄭嘅「大和解」以犧牲法治為代價，連香港核心價值都葬送埋，呢樣先至係罪大惡極吖！