林浩鈞冠忠南區勁過謝拉特

傑斯、托迪、馬甸尼都是世界球壇難得的「忠心」分子，本地波也有位林浩鈞，由15歲投考青年軍加盟仍是丙組的南區，到現時30歲經歷了升班、降班再衝港超聯……這15個寒暑讓這位「老兵（老資格）」回味無窮：「我自細住喺南區，讀書都喺呢度，當年15歲撞正有區隊招募，我就同啲同學抱住去玩嘅心態試腳，點知投考成功，一踢就踢咗呢支球隊15年！最初隊波都係業餘踢丙組，即使我中學畢業後都繼續『柴娃娃』咁踢，雖然一邊揸貨車、一邊兼顧練波，但『兄弟班』卻能夠喺2011年贏到初級組銀牌冠軍，真係畢生難忘……尤其以隊長身份喺大球場捧盃，我都好想喺有生之年再試多一次！」

一踢15年柴娃娃變專業

問到在這15年內，可曾想過離開南區，「鈞仔」坦承曾有此念頭：「加盟球隊第10年，球隊仍喺乙、丙組浮沉，但我已經25歲，雖然仲好鍾意踢波，但要同時兼顧正職揸貨車工作真係好難，有諗過『算把喇』直接退出就算！好彩嗰年爭到升甲組資格（即現為港超等級），喺『大頭文（教練馮凱文）』帶領下踢出『蔗渣價錢燒鵝味道』，連續兩屆拎到聯賽第4，亦得到新衝擊同埋成功感，所以又繼續踢落去！」

去到2014年，球隊不參戰新成立的港超聯，換句說話即要降到甲組重新起步，但只經過短短一季，南區又再憑實力回歸頂級聯賽！這次搭「升降機」更堅定了「鈞仔」留隊的志向：「雖然要落番甲組，但反而令球隊有更多時間為未來計劃籌備，當中得到冠忠巴士贊助後，更定下長遠目標！呢次重返頂級聯賽，球隊變得好專業，我亦做到職業球員，即使差唔多30歲先夢想成真，但見證到呢隊波同自己由青年軍、柴娃娃、兄弟班再走向專業……相信呢個經歷唔係人人都可以有！」

「無顧慮踢波 後備又如何？」

不過，正是球隊日益壯大，有實力球員不斷加盟，令到昔日的隊長、升班功臣也變成長居後備，然而「鈞仔」卻毫無怨言：「我好鍾意踢波，由15歲參加業餘嘅南區開始，一直都因為工作生活，唔可以全情投入去踢波！但依家我可以日日有波練，仲無後顧之憂去踢足球，我仲可以有咩唔滿意呢？」林浩鈞坦言經過15年光景後，已與南區不可分，除非掛靴，否則仍會「一生一球會」！

本周賽程

菁英盃分組賽

3月17日（六）

B組

R&F富力 Vs 冠忠南區

元朗大球場

下午2時30分

$80、$30（特惠票）

A組

東方龍獅 Vs 陽光元朗

旺角大球場

下午5時30分

$80、$30（特惠票）

3月18日（日）

B組

傑志 Vs 標準流浪

斧山道運動場

下午2時30分

$80、$30（特惠票）

A組

理文 Vs 和富大埔

青衣運動場

下午5時30分

$80、$30（特惠票）

圖/文：司徒子文