近排大家應該體會到香港有「水都威尼斯」多少影子，水管爆完一條又一條，鹹水淡水都有，如果真係「水為財」，香港呢個日日在撕裂嘅城市，啲銀紙似細胞裂變，想唔發都難矣！四條馬路三條浸，一城水色半城船（車被水浸），香港呢個噴泉之都，你——值得擁有！
日前黃大仙下邨一條直徑六吋嘅地底鹹水管於凌晨爆裂，鹹水沖開渠蓋直噴上空，形成約廿米噴泉，蔚為奇觀！
事實是，隔三岔五必有水管爆裂，日前，恩平道爆食水管，大量泥沙被沖到渣甸坊排檔。早前，青山公路荃灣段西行近福來邨位置爆水管，大量食水湧上行人路，甚至湧進路旁嘅地舖、銀行，部分因而要停業，貨車受困，十分狼狽；幾日前，觀塘道爆鹹水管、屯門湖翠路爆水管、大嶼山嶼南路近長沙一帶爆水管……阿哥，真係香港有、九龍有、新界有、離島有，條條大路有噴泉；人哋就春城無處不飛花，我哋就香城無處不噴水，你話今個夏天，使鬼去海洋公園啲水上樂園玩咩，只要着定泳衣泳褲，揸揸吓車分分鐘有驚喜。
香城無處不噴水，老朽相信吸引過「美食車」，政府及旅遊業議會應該廣為宣傳，遲吓泰國「潑水節」說不定都移師香江，香港呢個噴泉之都，或許再吸引更多外國遊客來觀光，「香港水舞間」唔使買飛隨時有得睇，美食車全部轉賣「水蟹粥」，唔單止可起死回生，說不定更賺個盆滿缽滿，一百幾十蚊一碗粥，好賺過篤魚蛋！
水管常常爆裂，係人都知係因為水管老化，水務署N年前已經大聲疾呼話整項更換及修復水管工程會在一五年完成，工程完成後，水管爆裂及滲漏事故將大幅減少云云。幸好水務署又係聲大大冇貨賣，大家見到啲水管好似玩扑傻瓜咁，一個爆完又一個凸起，搞到香城水汪汪，如此壯觀之景，想唔「欣賞香港」都過意唔去喇！