港產官僚冇嘢叻，最叻就係賴地硬。十年建屋目標一再落空，高官居然好意思叫人唔好淨係向政府追數，要成個社會一齊面對。實情係港府作為全港最大地主，縱容部門生人霸靚地，自己帶頭暴殄天物，講咩「寸土必爭」、「見縫插針」都係得啖笑嘅啫！
淨係睇吓位於中環海濱黃金地皮嘅郵政總局，就知咩料喇。城規會尋日開會討論中環新海濱第三號用地「綜合發展區」地帶嘅規劃大綱，規劃署代表話喎，雖然有意見認為建築物有歷史價值，反對清拆，但如果由得郵政總局喺原址保留，設計概念就會無法實現。聽落搬竇大計似乎勢在必行，但其實郵政總局上世紀八十年代已經計劃清拆並覓址安置，即使唔再節外生枝，最快都要去到二○二二年至落實，前後拖咗近四十年，莫講話搬個辦公室，建造太空船探月都夠時間啦，下話！
大家應該記得之前因為東北發展計劃，幾百名石仔嶺長者宿舍院友慘遭迫遷，淪為人球嘅一幕，查實如果港府有對付弱勢群體一半嘅決心，郵政總局地皮一早就另有發展。大家有眼見，香港郵政拖得就拖，冇得拖就撒賴，除咗要求鄰近位置更優越嘅海濱地皮，仲打埋九龍灣臨海靚地主意，奇就奇在港府居然任得佢予取予攜，香港郵政「最牛釘子戶」之名，果然實至名歸。
呢嗱，有人就講得啱嘞，今時今日已經唔興寄信，香港郵政愈做愈縮，根本冇必要佔用咁高地價嘅地段。係人都知，市區甲級寫字樓靚地彌足珍貴，拎出市場賣閒閒哋收番數以百億元，點都冇理由咁嘥料啩？最弊嘅係，政府部門長期霸佔市區地王，香港郵政只係冰山一角。港府早喺○八年已計劃將灣仔海旁包括入境事務大樓等三幢政府辦公大樓搬去將軍澳，點知又係議而不決，決而不行，最新消息話最快二○二三年完工，比原定計劃足足遲咗五年。至於其他官地養蚊嘅例子，更加多到天光都數唔完，由公眾街市到公務員宿舍，再到私人會所，唔係長期丟空就係賤價批出，結果同樣係得物無所用。
好心港產官僚學吓人哋啦，家陣唔少大城市為減輕市中心壓力，帶動新區發展，好多時都會將政府部門搬去郊區，北京市政府搬去遠郊嘅通州，就係最佳例子。正如有學者建議，政府部門轉移到新界，一來可促進新界區就業，二來可減少來往市區同郊區交通壓力，一舉兩得，何樂而不為。
點講都好喇，港府有地唔識用，反而一味呻「地從何來」，簡直愚不可及，畀人揶揄「走數政府」，都係自己攞嚟衰嘅咋！