香港人出名食得招積，個個都以食家自居，可惜吖，港產官僚雖然同樣鍾意飲飲食食，但偏偏最唔鍾意做嘢，搞到掛羊頭賣狗肉嘅海鮮食品賣通街，誤導消費者，幾嘴刁嘅人都會中招喇。
嗱，環保組織早前抽查本港超市出售嘅冷藏海鮮，並進行DNA測試，結果嚇人一跳，七個樣本之中，多達四個貨不對辦，比率高達五成七，消費者超過一半機會買錯次貨。例如某超市出售嘅冷藏西星斑被標示為售價貴兩倍嘅東星斑，擺明渾水摸魚嘞。咁仲唔止，有冷藏海參嘅產品標籤列明來源地係西非尼日利亞，但有關地區根本冇呢隻品種出產，產品與產地不符，即係博懵啫。除咗貨不對辦，超市提供嘅冷藏海鮮產品標籤一樣出事，多達八成二冇列齊品種、來源地及生產方法，消費者連食咗咩落肚都唔清唔楚。
正如環保團體話齋，咪以為海鮮產品標籤出錯好小事，咁做不但涉嫌違反《商品說明條例》，一旦食物安全出咗問題，當局追蹤時就會難度大增，亦會影響回收工作。再講吖，潮流興保育，超市將產品標籤資料寫到天殘地缺，消費者隨時食咗瀕危物種都唔知，好似西星斑咁吖，早就被世界自然保護聯盟列為易危物種，超市當成東星斑出售，難聽啲講句，即係陷消費者於不義啫。
講到尾，次貨之所以大模廝樣扮成上菜賣通街，都係拜食安官僚懶懶閒所賜，如果唔係佢哋監管不力，放任自流，超市都唔敢明目張膽亂以次充好喇。話就話有《商品說明條例》，但如果冇人舉報，海關亦闊佬懶理，無王管咯喎，咪即係鼓勵商家博大霧囉。好老實講，環保團體都要驗過DNA至知產品係咪同標籤不符，一般市民單憑肉眼根本難以分辨，官老爺不監不管，你話唔係靠害係乜吖？
有數得計，去年海關共檢控一百零六宗違反《商品說明條例》個案，但涉及食品及飲品嘅只佔一成七咁大把，唔怪得食安警鐘長鳴嘞。咁又係嘅，官僚靠得住，豬乸會上樹，莫講話官老爺對標籤與產品不符呢啲咁「濕碎」嘅問題唔會上心，就算係黑心食品長驅直入咁大件事，一樣關人個關嘅咋。呢，淨係最近嘅致癌大閘蟹風波咋，蟹季過咗大半，食安中心至話回收，證明當局幾咁後知後覺。一節見則百節知，超市出售冷藏海鮮亂象叢生，大家知點解啦。
都係嗰句，民以食為天，食以安為先。今次西星斑充東星斑，消費者最多係損失金錢啫，不至於食出病來，但黑心食品就唔同講法，官老爺繼續烏瀡瀡，想唔爆大鑊都幾難咯。