九成民意撐退保 港府卸責千夫指

孔夫子講得冇錯,聽其言更要觀其行。所以咯喎,當大家睇到政務司司長林鄭月娥含住一泡眼淚,口震震咁話現屆政府社福開支大增五成五令佢感到好驕傲,千祈咪以為佢重視民間疾苦呀,實際上可能啱啱相反嘅咋。

唔信嘅,睇吓佢對全民退保嘅態度咪知囉。扶貧委員會日前開會討論顧問公司就全民退保所撰寫嘅研究報告,提到港府諮詢期內共收到一萬八千多份意見書,當中超過一萬六千份支持全民退保,佔總數九成一,證明全民退保眾望所歸,所謂嘅「有經濟需要」方案不得民心。不過咁,港府出名輸打贏要,邊會咁順攤吖,有委員就踢爆林鄭月娥玩彈弓手,禁止扶委會就免審查方案作投票表態,預告政府堅拒推行免審查嘅全民退保,擺明與民為敵喇。

咁仲唔止,傳聞顧問公司份報告幫理不幫親,如實反映市民支持全民退保嘅意願,搞到林鄭月娥好唔高興,要求改動字眼。雖然勞福局出面否認,但空穴來風,未必無因㗎。正如有人話齋,港府只准許一種聲音存在,唔啱聽嘅就發動群眾鬥群眾,唔係話推行全民退保加重年輕人負擔,就係鬧爆撐退保嘅學者「講嘢隨意」、「冇深思熟慮」,簡直令人心寒。

講真,全民退保大大話話講足二十年,仲係現屆政府施政承諾之一添,社會早就有晒共識,點知港府一味諗縮數,拖得就拖,卸得就卸,甚至揚言要大幅加稅,即係恐嚇市民啫。關注團體就講得啱嘞,家陣九成一人撐退保,民意彰彰明甚,港府與其輸打贏要,係都要同民意過唔去,不如集中精神講融資方法,解決錢從何來仲實際吖。

話時話,香港推行全民退保唔係冇資源,爭在官僚有冇心嘅啫。港府係世上最有米嘅政府,天文數字嘅外匯儲備唔在講,淨係講財政儲備咋,目前已經達到八千多億元,計埋今個財政年度又係豬籠入水,明年可能高達九千億元添。取之於民,用之於民,天經地義,唔通呢啲財政儲備只係為公務員退休而設,其他市民得個恨字?唔通只許高官高薪厚祿兼咬長糧咬到死,其他打工仔就只能望天打卦,靠執紙皮酒樽幫補家計,一殼眼淚?

一個冇解決後顧之憂嘅社會,係冇可能穩定嘅。香港人口老化加劇,政府揸住大把錢,唔係未雨綢繆,早為之計,而係千方百計推卸安老責任,市民點會冇怨氣吖,社會又點會唔混亂吖。你話嘞,如果呢啲咁刻薄嘅官員成為下屆特首,全民退保肯定無望,打工仔仲有運行嘅!